Independence Day celebrated : हिमायतनगर तहसील कार्यालयात स्वातंत्र्य दिन उत्साहात साजरा
हिमायतनगर, अनिल मादसवार| येथील तहसील कार्यालयात ७९ वा स्वातंत्र्य दिन मोठ्या उत्साहात साजरा करण्यात आला. एक दिवस आधीपासूनच देशभक्तीच्या वातावरणात सजावट व तयारी करण्यात आली होती.
कार्यक्रमाची सुरुवात राष्ट्रपिता महात्मा गांधी व डॉ. बाबासाहेब आंबेडकर यांच्या प्रतिमेच्या पूजनाने झाली. सकाळी ९:०५ वाजता तहसीलदार तथा तालुका दंडाधिकारी सौ. पल्लवी टेमकर यांच्या हस्ते ध्वजारोहण पार पडले. राष्ट्रगीत व महाराष्ट्र गीतानंतर पोलिस बांधवांनी तिरंग्याला मानवंदना दिली.
तहसीलदार टेमकर यांनी नागरिकांना स्वातंत्र्य दिनाच्या शुभेच्छा दिल्या आणि ‘हर घर तिरंगा’ उपक्रमांतर्गत आयोजित विविध स्पर्धांच्या विजेत्यांना प्रमाणपत्र व ट्रॉफी देऊन गौरविण्यात आले. कार्यक्रमास श्री परमेश्वर मंदिर ट्रस्टचे उपाध्यक्ष महावीरचंद श्रीश्रीमाळ, नायब तहसीलदार पंगे, नगरपंचायतीचे महाजन, बोकारे आदी मान्यवरांसह विविध शासकीय कार्यालयांचे अधिकारी, कर्मचारी आणि नागरिक मोठ्या संख्येने उपस्थित होते.
