Awarded : “मराठवाडा आयकॉन्स २०२५” हा प्रतिष्ठीत पुरस्कार साहेबराव पवार उर्फ गुरु स्वामी यांना

किनवट, परमेश्वर पेशवे| मराठवाडा विभागातील सामाजिक, धार्मिक आणि राजकीय क्षेत्रात उल्लेखनीय कार्य करणाऱ्या व्यक्तींना दरवर्षी दिला जाणारा “मराठवाडा आयकॉन्स २०२५” हा प्रतिष्ठीत पुरस्कार यंदा आध्यात्मिक गुरु श्री साहेबराव पवार उर्फ गुरु स्वामी यांना प्रदान करण्यात आला. या गौरवाच्या निमित्ताने भारतीय जनता पक्षाच्या वतीने किनवट येथे आयोजित रक्तदान शिबिरात त्यांचा जाहीर सत्कार करण्यात आला.

छत्रपती संभाजीनगर येथील पंचतारांकित हॉटेल रामा इंटरनॅशनल येथे भव्य समारंभात विविध मान्यवरांच्या प्रमुख उपस्थितीत हा पुरस्कार देण्यात आला. यामध्ये विधान परिषदेचे विरोधी पक्षनेते श्री. अंबादास दानवे, खासदार कल्याण काळे, तसेच विभागीय आयुक्त पापळकर हे प्रमुख पाहुणे म्हणून उपस्थित होते. या पुरस्कारासाठी विभागातील सामाजिक, धार्मिक, शैक्षणिक, राजकीय आणि उद्योजकीय क्षेत्रात मोलाचे कार्य करणाऱ्या व्यक्तींची काटेकोर तपासणी करून निवड केली जाते.

गुरु स्वामी यांनी नांदेड जिल्हा आणि विशेषतः किनवट तालुक्यात सामाजिक पुनर्बांधणी, आध्यात्मिक जागृती, व्यसनमुक्ती चळवळ, युवकांचे प्रबोधन, धार्मिक प्रोत्साहन अशा विविध क्षेत्रात सक्रिय कार्य केले आहे. त्यांच्या मार्गदर्शनामुळे अनेक कुटुंबांमध्ये परिवर्तन झाले असून, सामाजिक सलोखा आणि आध्यात्मिक जीवनशैलीचा प्रसार झाला आहे.

या सन्मानप्राप्तीनंतर किनवट येथे त्यांचा भव्य सत्कार समारंभ पार पडला. या कार्यक्रमात माजी उपनगराध्यक्ष श्रीनिवास नेम्मानिवार, भाजपा मंडळ अध्यक्ष स्वागत आयनेनीवार, माजी नगरसेवक शिवाजी आंधळे, सागर पिसारीवार, बाळकृष्ण कदम, ॲड. माझ बडगुजर, सुमित इटकेपेल्लीवार, पत्रकार मधुकर अन्नेलवार, रामु शेपुरवार, राजेंद्र भातनासे, आदिवासी आघाडीचे संतोष कनाके, नरसिंग तक्कलवार, अक्षय पावडे यांच्यासह अनेक मान्यवर, कार्यकर्ते व नागरिक मोठ्या संख्येने उपस्थित होते.

गुरु स्वामी यांच्या कार्याची आणि योगदानाची प्रशंसा करत उपस्थित मान्यवरांनी त्यांना पुढील कार्यासाठी शुभेच्छा दिल्या. समाजहिताच्या कामासाठी त्यांचे कार्य हे प्रेरणादायी असून नव्या पिढीला दिशा देणारे असल्याचे मत वक्त्यांनी मांडले. कार्यक्रमाचे संयोजन उत्तमरित्या पार पडले असून, या सन्मानामुळे किनवट तालुक्याचा गौरव वाढला आहे.