Nanded ACB’s big trap : दहावीच्या सनद दुरुस्तीसाठी लाच! नांदेड ACBचा मोठा सापळा; शिक्षक व शिपाई रंगेहात पकडले
नांदेड | दहावीच्या सनदवरील जन्मतारीख दुरुस्त करून देण्याच्या नावाखाली लाच मागणाऱ्या महात्मा कबीर विद्यालय, सहयोग नगर, नांदेड येथील शिक्षक व शिपायाला लाचलुचपत प्रतिबंधक विभागाने (ACB) रंगेहात पकडले. या कारवाईमुळे शिक्षण क्षेत्रातील भ्रष्टाचार पुन्हा एकदा उघडकीस आला आहे.
२४ वर्षीय महिला तक्रारदार यांनी दिनांक २ फेब्रुवारी २०२६ रोजी ACB नांदेडकडे तक्रार दाखल केली होती. तक्रारदार यांनी सन २०१६ मध्ये महात्मा कबीर विद्यालयातून दहावीचे शिक्षण पूर्ण केले असून, त्यांच्या दहावीच्या सनदवरील जन्मतारीख चुकीची असल्याने दुरुस्तीसाठी त्यांनी शाळेतील शिक्षक मनोहर अर्जुनराव शिंदे (वय ४५) यांच्याशी संपर्क साधला.
शिक्षक शिंदे यांनी जन्मतारीख दुरुस्त करून देण्यासाठी सुरुवातीला ₹१,००० रोख व त्यानंतर ₹२,२०० फोन-पे द्वारे स्वीकारले. त्यानंतर पुन्हा ₹४०० अतिरिक्त रक्कमेची मागणी करण्यात आली. ही लाच देण्यास नकार देत तक्रारदारांनी ACBकडे धाव घेतली.
ACBने तक्रारीची पडताळणी केली असता, शिक्षक शिंदे यांनी शिपाई सचिन सतीश शिवरामवार (वय ३९) याच्या माध्यमातून लाचेची मागणी केल्याचे स्पष्ट झाले. दिनांक ३ फेब्रुवारी २०२६ रोजी ACB पथकाने सापळा रचून शिक्षक शिंदे यांनी स्वतःसाठी व शिपायासाठी ₹४०० लाच स्वीकारताना दोघांनाही रंगेहात पकडले. शिक्षक मनोहर शिंदे यांच्या अंगझडतीत ₹६५० रोख, सॅमसंग गॅलेक्सी S22 अल्ट्रा मोबाईल, ड्रायव्हिंग लायसन्स, चांदीच्या अंगठ्या व सोन्याचा तुकडा आढळून आला. शिपाई सचिन शिवरामवार याच्याकडे ₹१,५९० रोख, ओप्पो मोबाईल, ड्रायव्हिंग लायसन्स, आधार कार्ड व गळ्यातील ओमची गोफ मिळून आली.
गुन्हा दाखल करण्याची प्रक्रिया सुरू
दोन्ही आरोपींना ताब्यात घेण्यात आले असून, पोलीस ठाणे भाग्यनगर, नांदेड येथे भ्रष्टाचार प्रतिबंध अधिनियम १९८८ चे कलम ७ अन्वये गुन्हा दाखल करण्याची प्रक्रिया सुरू आहे. मोबाईल तपासणी व घरझडतीची कार्यवाहीही सुरू असल्याची माहिती देण्यात आली आहे.
ही यशस्वी कारवाई पोलीस निरीक्षक अर्चना करपुडे (ACB नांदेड), यांच्या नेतृत्वाखाली, तसेच पोलीस उपअधीक्षक राहुल तरकसे यांच्या पर्यवेक्षणाखाली पार पडली. शिक्षण संस्थांमधील लाचखोरीविरोधात ACBने केलेल्या या कारवाईमुळे जिल्ह्यात खळबळ उडाली असून, भ्रष्ट कर्मचाऱ्यांना स्पष्ट इशारा मिळाला आहे.
