Social Media : तालुका पातळीवर प्रशासकीय सोशल मीडिया प्लॅटफॉर्म तयार करण्याची मागणी
देगलूर, गंगाधर मठवाले| प्रशासनाशी संबंधित विविध घडामोडी, शासन निर्णय, योजनांची माहिती, अधिकाऱ्यांच्या भेटी, कार्यक्रमांचे फोटो जनतेच्या सेवेसाठी करण्यात येणारी कामे, योजना आदींची माहिती मिळण्यासाठी तालुका पातळीवर अधिकृत सोशल मीडिया प्लॅटफॉर्म तयार करण्याची मागणी. व्हाईस ऑफ मीडिया शाखा देगलूरच्या वतीने दि.१७ जुलै रोजी उपजिल्हाधिकारी देगलूर यांच्याकडे लेखी निवेदनाद्वारे करण्यात आली आहे.
दि.१७ जुलै रोजी व्हाईस ऑफ मीडिया शाखा देगलूरच्या वतीने उपजिल्हाधिकारी अनुप पाटील यांना एक लेखी निवेदन देण्यात आले असून या निवेदनानुसार, सध्या नांदेड जिल्हा माहिती कार्यालयामार्फत एक फेसबुक जिल्हा माहिती कार्यालय या नावाने ग्रुप चालविला जात आहे.ज्यामध्ये जिल्हा व शहरातील प्रशासनाशी संबंधित विविध घडामोडी, शासन निर्णय, योजनांची माहिती, अधिकाऱ्यांच्या भेटी, कार्यक्रमांचे फोटो व माहिती वेळोवेळी प्रसिद्ध केली जाते.
या माध्यमातून जिल्ह्यातील पत्रकारांना सत्य व अधिकृत माहिती मिळते. त्यामुळे समाज माध्यमांद्वारे जनतेपर्यंत प्रशासनाचे कार्य पोहोचवण्याचे महत्त्वाचे कार्य पार पाडले जाते.मात्र देगलूरला तालुका पातळीवर अशा स्वरूपाचा अधिकृत सोशल मीडिया प्लॅटफॉर्म किंवा ग्रुप अस्तित्वात नसल्यामुळे तालुक्यातील पत्रकारांना प्रशासनाकडून होत असलेल्या उत्कृष्ट कार्याची माहिती वेळेवर मिळत नाही.अधिकारी कामात व्यस्त असल्याने अनेकदा फोनवर संपर्क होत नाही. त्यामुळे पत्रकारांना बातमीसाठी आवश्यक आणि अधिकृत माहिती मिळत नाही.परिणामी प्रशासनाचे महत्त्वाचे कार्य, योजना आणि भूमिका या तालुक्यातील जनतेपर्यंत पोहोचत नाहीत.
या पार्श्वभूमीवर देगलूर तालुक्यांतील माहिती कार्यालयांनी स्वतंत्ररित्या एक अधिकृत सोशल मीडिया ग्रुप (जसे. व्हाट्सअप टेलिग्राम इ.) तयार करावा. या ग्रुपमध्ये स्थानिक प्रशासनाचे प्रतिनिधी, विविध खात्यांचे अधिकारी व पत्रकारांचा समावेश करून प्रशासनाशी संबंधित माहिती, योजना, कार्यक्रम यांचे अधिकृत अपडेट वेळोवेळी शेअर करावेत.या उपक्रमामुळे प्रशासन आणि पत्रकार यांच्यातील समन्वय वाढेल.पत्रकारांना अचूक व अधिकृत माहिती वेळेवर उपलब्ध होईल.प्रशासनाच्या कार्याची पारदर्शकता वाढेल.शासनाच्या विविध योजनांचा लाभ अधिकाधिक जनतेपर्यंत पोहोचेल.
अशा प्रकारची मागणी करण्यात आली आहे.याप्रसंगी व्हाईस ऑफ मीडियाचे तालुकाध्यक्ष प्रा. निवृत्ती भागवत, सचिव शब्बीर शेख, उपाध्यक्ष सतीश पांडवे, प्रसिद्धी प्रमुख शिवकुमार बिरादार,सदस्य दिगंबर जाधव व सामाजिक कार्यकर्ते धनाजी जोशी आदींची उपस्थिती होती.पत्रकार संघटनेच्या मागणीचा विचार करून लवकरात लवकर सोशल मीडिया ग्रुप तयार करण्याचे आश्वासन याप्रसंगी उपजिल्हाधिकारी अनुप पाटील यांनी दिले.
