Marathi Press Council : त्र्यंबकेश्वर येथे पत्रकारांवर झालेल्या हल्ल्याचा अ. भा. मराठी पत्रकार परिषदेकडून निषेध
मुंबई| त्र्यंबकेश्वर येथे टोल वसुली करणारया गुंडांकडून पत्रकारांवर झालेल्या हल्ल्याचा अखिल भारतीय मराठी पत्रकार परिषद, पत्रकार हल्ला विरोधी कृती समिती आणि डिजिटल मिडिया परिषदेने तीव्र शब्दात धिक्कार केला.. हल्लेखोरांवर कठोर कारवाई करावी अशी मागणी एस.एम देशमुख यांनी एका प्रसिद्धी पत्रकाद्वारे केली आहे.
त्र्यंबकेश्वर येथे साधू महंताची कुंभ मेळयाच्या संदर्भात बैठक होती त्या बैठकीचे वृत्तांकन करण्यासाठी काही पत्रकार नाशिक येथून त्र्यंबकेश्वर गेले होते.. त्र्यंबकेश्वर येथे दर्शनासाठी येणारया भाविकांना प्रवेश शुल्क भरावे लागते.. मात्र आम्ही पत्रकार आहोत आणि बातमी कव्हर करण्यासाठी आलो आहोत असे वारंवार सांगूनही टोलवरील कर्मचारी ऐकायला तयार नव्हते.. पत्रकार वरिष्ठांना फोन करीत असतानाच वसुली करणारया गुंडांनी पत्रकारांना मारहाण करायला सुरूवात केली.. यामध्ये झी – 24 तासचे योगेश खरे, पुढारी न्यूजचे किरण ताजणे, अभिजित सोनवणे आणि अन्य दोन पत्रकार जखमी झाले असून एका पत्रकारावर त्र्यंबकेश्वर येथील रूग्णालयात उपचार सुरू आहेत.
जिल्हाधिकारी यांनी पत्रकारांवर हल्ला करणारांवर कारवाई करण्याचे आश्वासन दिले असले तरी पुर्वानुभ बघता काही कारवाई होण्याची शक्यता नसल्याने मुख्यमंत्र्यांनी यात लक्ष घालून हल्लेखोरांना अद्दल घडेल अशी कारवाई करावी अशी मागणी देखील देशमुख यांनी केली आहे.. हल्लेखोरांवर कारवाई झाली नाही तर राज्यातील पत्रकार रस्त्यावर उतरतील असा इशारा एस.एम.देशमुख यांनी दिला आहे.
महाराष्ट्रात 2019 मध्ये पत्रकार संरक्षण कायदा झाला.. मात्र सात वर्षे झाली तरीही त्याची अंमलबजावणी होत नसल्याने पत्रकारांवरील हल्ले पुन्हा वाढले आहेत.. पत्रकार संरक्षण कायद्याच्या अंमलबजावणीचे नोटिफिकेशन काढून सरकारने तातडीने महाराष्ट्रात हा कायदा लागू करावा अशी मागणीही एस.एम. देशमुख यांनी केली आहे. परिषदेने काढलेल्या निषेध पत्रकावर अध्यक्ष मिलिंद अष्टीवकर, किरण नाईक, शरद पाबळे, शिवराज काटकर, सुरेश नाईकवाडे, मन्सूरभाई शेख, डिजिटल मिडिया परिषदेचे अध्यक्ष अनिल वाघमारे यांच्या स्वाक्षऱ्या आहेत.
