हिमायतनगर| हिमायतनगर शहपासून ते रेल्वेगेट अंतर्गत रस्त्याचे काम रेल्वे ब्रिज होणार म्हणून थांबून आहे. सदर रस्त्यावर पावसाच्या पाण्याने मोठ्याप्रमाणात चिखल झाला आहे. वाहनधारकांना जिव मुठीत धरून या अंतर्गत रस्त्यावरून प्रवास करावा लागत आहे. असून दुचाकी स्वाराचे किरकोळ अपघात रोजचेच झाले आहेत. या ठिकाणी एखादा गंभीर अपघात होण्याची शक्यता नाकारता येणार नाही. त्यामुळे वाहनधारक व शेतकरी वर्गातून अर्धवट काम ठेऊन निधी लाटण्याचा प्रयत्न करणाऱ्या ठेकेदाराच्या विरोधात तीव्र संताप व्यक्त केला जात आहे.
राष्ट्रीय महामार्ग रस्ता क्र. १६१ या अंतर्गत रस्त्यांच्या कामाला मंजूरी मिळून जवळपास १० वर्ष उलटून गेली आहेत. भोकर कडून हिमायतनगर दारुल उल्लूम पर्यत सिमेंट रस्ता झाला. रेल्वेगेट जवळ ब्रिज होणार म्हणून रेल्वेगेट ते हिमायतनगर शहरानजीक अंतर्गत रस्त्याचे काम थांबलेले आहे. सध्या पावसाळ्याचे दिवस असल्याने या अंतर्गत रस्त्यावर मोठ्याप्रमाणात चिखल झाला असून, चिखलातून मार्ग काढून या रस्त्यावरून प्रवाशी ये,जा करीत आहेत. चिखल व खड्डेमय रस्त्यावर घसरगुंडी झाल्याने दुचाकी स्वारासाठी हा अंतर्गत रस्ता मृत्यूचा सापळा बनला आहे. नागपूर स्थितीत भाईजी नामक ठेकेदाराने जाणीवपूर्वक हे काम प्रलंबित ठेवून प्रवाश्यांना त्रास देत असल्याच्या संतापजनक प्रतिक्रिया नागरीकातून व्यक्त होत आहेत.
राष्ट्रीय महामार्ग रस्त्यावर झालेल्या चिखलातून मार्ग काढताना रोजच किरकोळ अपघात घडत आहेत. या ठिकाणी एखादा मोठा अपघात घडू नये, या करीता संभाव्य धोका टळावा. म्हणून या अंतर्गत रस्त्यावर सद्यस्थितीत चुरी अथवा डस्ट अंथरून प्रवाश्यांना दिलासा द्यावा. तसेच रेल्वे ब्रिजचे काम हाती घेण्यात येवून ते वेगाने पुर्ण करावे अशी मागणी शेतकरी, नागरिक, वाहनधारक प्रवाशांकडून केली जात आहे.