हदगाव, गौतम वाठोरे | हदगाव तालुक्यातील हरडफ शिवारात पैनगंगा नदीच्या तीरावर वसलेल्या नैसर्गिक रम्य परिसरातील वानवाडी महादेव मंदिर (हरडफ) येथे महाशिवरात्रीनिमित्त १४ फेब्रुवारीपासून भव्य यात्रेला उत्साहात सुरुवात झाली आहे. महाशिवरात्रीच्या पार्श्वभूमीवर मंदिर परिसरात विविध धार्मिक कार्यक्रमांचे आयोजन करण्यात आले असून परिसर ‘हर हर महादेव’च्या जयघोषाने दुमदुमून गेला आहे.
यात्रेदरम्यान दररोज सकाळ व संध्याकाळ भजन, कीर्तन, पूजा-अर्चा तसेच महाप्रसादाचे आयोजन करण्यात येत आहे. हे पुरातन महादेव मंदिर ऐतिहासिक वारसा लाभलेले असून पूर्वी हरडफ शिवारात वसलेले वानवाडी गाव कालांतराने स्थलांतरित झाले आहे. विशेषतः लिंगायत समाजातील अनेक कुटुंबे इतरत्र स्थायिक झाली असली, तरी आपल्या जन्मभूमीशी असलेली नाळ जपण्यासाठी दरवर्षी या यात्रेला ते आवर्जून उपस्थित राहतात.
हरडफ–धोत्रा मार्गावर चार गावांच्या सीमेवर वसलेले हे मंदिर हरडफ, धोत्रा, देवसरी, रावणगाव व टाकळा येथील शिवभक्तांचे प्रमुख श्रद्धास्थान आहे. या पाचही गावांतील भाविक सलग तीन दिवस मंदिर परिसरात मुक्काम ठोकून महादेवांची पूजा-अर्चा करतात.
यावर्षी मंदिराचा जीर्णोद्धार माजी जिल्हा परिषद सदस्य पंजाबराव पाटील कदम, तंटामुक्ती अध्यक्ष बालाजी सूर्यवंशी, उत्तम वारकड, रामराव वारकड, कानबा सूर्यवंशी, राजू पाटील मोरे, शिवाजी जाधव, संभाजी जाधव, शेषराव पाटील कदम, ज्ञानेश्वर मोरे, रमेश मोरे, अविनाश मोरे, पंजाब मोरे, किसनराव सूर्यवंशी, युवा नेते मारुती सूर्यवंशी आदींसह गावातील शिवभक्तांच्या पुढाकारातून करण्यात आला. मंदिराला संरक्षक जाळी बसविण्यात आल्याने यंदा मंदिर अधिक आकर्षक व सुरक्षित झाले आहे.
आज झालेल्या महाप्रसादाच्या कार्यक्रमास भाविकांची अफाट गर्दी झाली होती. यावेळी उत्तम वारकड, दयाळगीरी महाराज, कानबा सूर्यवंशी, शेषराव पाटील कदम, मारुती सूर्यवंशी, पंजाब मोरे, रामराव सूर्यवंशी, दत्तराव जाधव, धोंडबाराव धावडकर, मारोतराव पाटील सूर्यवंशी, पंडित सूर्यवंशी, संभाजीराव पाटील जाधव, दत्तराव कदम, पप्पू मोरे, कृष्णा गिरामकर, विक्रांत वाठोरे, अरविंद कदम यांच्यासह ग्रामस्थ मोठ्या संख्येने उपस्थित होते.
महाशिवरात्रीनिमित्त सुरू झालेली ही यात्रा मोठ्या उत्साहात व भक्तिभावाने पार पडत असून पुढील काही दिवस विविध धार्मिक कार्यक्रमांनी संपूर्ण परिसर भक्तीमय वातावरणात न्हाऊन निघणार आहे.
