MPDA : येळी येथील रेती तस्कर मुरलीधर ढगे एमपीडीए अंतर्गत स्थानबद्ध
उस्माननगर (माणिक भिसे) रेती तस्करीप्रकरणी अनेक गुन्हे दाखल असलेल्या येळी (ता. लोहा) येथील कुख्यात रेती तस्कर मुरलीधर प्रकाश ढगे यास एमपीडीए (MPDA) कायद्यान्वये एक वर्षासाठी स्थानबद्ध करण्यात आले आहे.
मुरलीधर ढगे हा गेल्या अनेक दिवसांपासून गोदावरी नदीच्या पात्रातून बेकायदेशीररीत्या रेती उपसा करून त्याची चोरटी विक्री करत होता. त्याच्याविरोधात विविध पोलीस ठाण्यांमध्ये रेती तस्करीचे अनेक गुन्हे दाखल असून, त्याच्या गुन्हेगारी कारवायांमुळे परिसरात दहशतीचे वातावरण निर्माण झाले होते. गुंड प्रवृत्तीच्या लोकांना सोबत घेऊन सामान्य नागरिकांना धमकावण्याचे प्रकारही तो करत असल्याचे निष्पन्न झाले आहे.
सदर कारवाईचा प्रस्ताव श्री. संजय निलपत्रेवार, सहायक पोलीस निरीक्षक, उस्माननगर पोलीस ठाणे यांनी तयार केला होता. पोलीस अधीक्षक अविनाश कुमार यांच्या मार्गदर्शनाखाली उदय खंडेराय, पोलीस निरीक्षक, स्थानिक गुन्हे शाखा, नांदेड यांनी प्रस्तावाला अंतिम स्वरूप देत तो मंजुरीसाठी जिल्हाधिकारी राहुल कर्डिले यांच्याकडे सादर केला.
यावरून दि. 31 डिसेंबर 2025 रोजी जिल्हाधिकारी तथा जिल्हादंडाधिकारी राहुल कर्डिले यांनी मुरलीधर प्रकाश ढगे यास MPDA कायद्यान्वये एक वर्षासाठी स्थानबद्ध करण्याचे आदेश दिले. आदेशानंतर उस्माननगर पोलिसांनी तात्काळ कारवाई करत ढगे यास ताब्यात घेऊन हर्सुल मध्यवर्ती कारागृह, छत्रपती संभाजीनगर येथे रवानगी केली.
रेती तस्करीमुळे नदीपात्राचे अपरिवर्तनीय नुकसान, पर्यावरणीय असंतुलन तसेच सार्वजनिक सुव्यवस्थेवर गंभीर परिणाम होत असल्याने, अशा गुन्हेगारी प्रवृत्तीविरुद्ध कठोर कारवाई करण्यात येत असल्याचे पोलीस प्रशासनाकडून स्पष्ट करण्यात आले आहे.
नांदेड जिल्ह्यात अवैध वाळू तस्करीला आळा घालण्यासाठी पोलीस व महसूल प्रशासनाच्या संयुक्त विशेष मोहिमा सुरू असून, सन 2024 मध्ये 13, सन 2025 मध्ये आतापर्यंत 37 सराईत गुन्हेगारांना MPDA अंतर्गत स्थानबद्ध, तर महाराष्ट्र पोलीस कायदा कलम 55 अंतर्गत 165
कलम 56 अंतर्गत 35 गुन्हेगारांना हद्दपार करण्यात आले आहे.
“कायद्यापुढे कोणीही मोठा नाही. जनतेची सुरक्षितता व सार्वजनिक सुव्यवस्था राखणे हीच आमची सर्वोच्च प्राथमिकता आहे,” असा स्पष्ट संदेश या कारवाईतून जिल्हादंडाधिकारी राहुल कर्डिले व पोलीस अधीक्षक अविनाश कुमार यांनी दिला आहे.
