Manaji Patil Lonikar ; लोणीतील देवस्थानच्या जमिनीसाठी मानाजी पाटील लोणीकर यांचे आमरण उपोषण
देगलूर l तालुक्यातील लोणी येथील श्री मारोती देवस्थानची १४ एकर जमीन परत देवस्थानाच्या नावे करण्यात यावी, अन्यायकारक फेरफार रद्द करावे, तसेच शासनाने योग्य ती कारवाई करावी, या मागणीसाठी शिवसेना उपतालुकाप्रमुख व लोणीचे उपसरपंच मानाजी पाटील लोणीकर यांनी आमरण उपोषण सुरू केले आहे. उपोषण देगलूर येथील उपजिल्हाधिकारी कार्यालयासमोर सुरू आहे.
मानाजी पाटील यांनी उपोषणादरम्यान सांगितले की, श्री मारोती देवस्थानची जमीन अनधिकृतरीत्या खरेदी-विक्री करून फेरफार करण्यात आले आहेत. हे फेरफार तातडीने रद्द करून जमीन पुन्हा देवस्थानाच्या नावे वर्ग ३ मध्ये नोंदविण्यात यावी. लोणी मंडळ अधिकाऱ्यांकडून पंचनामा करून जमीन शासन व मंदिर संस्थेच्या ताब्यात द्यावी. याशिवाय, देवस्थानच्या जमिनीवर झालेल्या अतिक्रमणाची व आजवर मिळालेल्या उत्पन्नाची मावेना वसुली करण्यात यावी, तसेच जमिनीवर उचललेले बँकेचे कर्ज वसूल करण्यात यावे, अशीही त्यांची मागणी आहे.
शासनाची फसवणूक करून जमीन ताब्यात घेतल्यामुळे संबंधितांवर फौजदारी कारवाई करून ४२० चा गुन्हा दाखल करण्यात यावा. देवस्थानची इनामी जमीन वर्ग १ दाखवून फेरफार करणाऱ्या तलाठ्यावर कठोर कारवाई करून त्याला निलंबित करण्यात यावे, अशी ठाम मागणीही त्यांनी केली आहे. वारंवार निवेदने दिल्यानंतरही प्रशासनाकडून दखल न घेतल्याने शेवटी आमरण उपोषणाचा मार्ग स्वीकारावा लागल्याचे पाटील यांनी स्पष्ट केले.
दरम्यान, उपोषण स्थळी शिवसेना उपजिल्हाप्रमुख महेश पाटील, शहरप्रमुख संजय जोशी, युवासेना तालुका प्रमुख भागवत पाटील सोमुरकर, माजी तालुकाप्रमुख घाळप्पा अंबेसंगे, भ्रष्टाचार निर्मूलन समितीचे बालाजी पाटील लंगोटे वळगकर, भाजपचे बालाजी मैलागिरे, श्रीनिवास उल्लेवार आदींनी भेट देऊन उपोषणाला पाठिंबा दर्शविला आहे.
