Nanded News : नांदेड–मुंबई व नांदेड–गोवा विमानसेवा १५ नोव्हेंबरपासून खा. अशोकराव चव्हाण यांच्या सातत्यपूर्ण पाठपुराव्याला यश
नांदेड| माजी मुख्यमंत्री व राज्यसभा खासदार अशोकराव चव्हाण यांच्या सातत्यपूर्ण पाठपुराव्याला अखेर यश आले असून, नांदेड – मुंबई आणि नांदेड – गोवा या बहुप्रतिक्षित विमानसेवा येत्या १५ नोव्हेंबरपासून सुरू होणार आहेत. नांदेड – मुंबई विमानसेवेसाठी नवी मुंबई विमानतळाऐवजी मुंबईतील मुख्य विमानतळ असलेल्या छत्रपती शिवाजी महाराज आंतरराष्ट्रीय विमानतळावर स्लॉट देण्याची मागणी खा. अशोकराव चव्हाण यांनी केली होती. ती मागणी देखील मंजूर झाली आहे, हे उल्लेखनीय!
खा. अशोकराव चव्हाण यांनी सोशल मीडियावर पोस्ट करून ही माहिती दिली आहे. त्यांनी दिलेल्या माहितीनुसार, या दोन्ही विमानसेवांचे संचालन स्टार एअर ही कंपनी करणार असून, या सेवा आठवड्याचे सातही दिवस उपलब्ध असतील. मुंबई – नांदेड विमान दररोज दुपारी ४.४५ वाजता मुंबईहून उड्डाण करून सायंकाळी ५.५५ वाजता नांदेडच्या श्री गुरु गोबिंदसिंघजी विमानतळावर उतरेल. त्याच विमानाचे सायंकाळी ६.२५ वाजता उड्डाण होऊन रात्री ७.३५ वाजता ते मुंबई विमानतळावर पोहोचेल. गोव्याच्या मोपा विमानतळावरून नांदेडला येणारे विमान दुपारी १२ वाजता उड्डाण करून १ वाजता उतरेल आणि दुपारी १.३० वाजता उड्डाण करून २.४० वाजता गोव्याला पोहोचेल.
या दोन्ही विमानसेवेमुळे नांदेडसह परभणी, हिंगोली आणि लातूर जिल्ह्यातील प्रवाशांना सोयीस्कर हवाई सुविधा उपलब्ध होणार आहे. विशेषतः मुंबईसाठी थेट विमानसेवा प्रवाशांना मोठा दिलासा आहे. नांदेडहून गोव्यासाठी विमानसेवा सुरु होणार असल्याने विशेषतः पर्यटकांना त्याचा लाभ मिळेल. नांदेडहून पूर्वी दिल्ली (हिंडन), अहमदाबाद, पुणे, बंगळूरू व हैद्राबाद अशा ५ विमानसेवा सुरु होत्या. मुंबई व गोव्याच्या विमानसेवेमुळे ही संख्या ७ वर गेली आहे. पुढील काळात नांदेडहून थेट तिरूपती, शिर्डी व कोल्हापूरसाठी विमानसेवा सुरु करणे हे आमचे उद्दिष्ट असेल, असे खा. अशोकराव चव्हाण यांनी म्हटले आहे.
नांदेड शहराची भौगोलिक स्थिती लक्षात घेऊन येथील रस्ते, रेल्वे आणि हवाई वाहतुकीशी संबंधित पायाभूत सुविधा अधिक सक्षम करण्यासाठी आम्ही सतत प्रयत्नशील आहोत. केंद्र आणि राज्य सरकारच्या स्तरावर विविध मागण्या मांडल्या असून, त्यांचा पाठपुरावा सुरु आहे. नांदेडहून मुंबई व गोव्यासाठी सुरू होणारी विमानसेवा हे त्या प्रयत्नांचेच फलित असल्याचे नमूद करून खा. अशोकराव चव्हाण यांनी पंतप्रधान नरेंद्र मोदी, मुख्यमंत्री देवेंद्र फडणवीस, नागरी उड्डयन मंत्री के. राममोहन नायडू आणि राज्यमंत्री मुरलीधर मोहोळ यांचे आभार मानले आहेत.
खा. अशोकराव चव्हाण यांचा २८ ऑक्टोबरला वाढदिवस असून, त्याच्या पूर्वसंध्येला त्यांनी सोशल मीडियावर नांदेड-मुंबई व नांदेड-गोवा विमानसेवेच्या शुभमुहूर्ताचे सूतोवाच करून नांदेडकरांना जणू एक मोठी भेट दिल्याची चर्चा नागरिकांमध्ये सुरु आहे. विशेष म्हणजे त्यांनी काही दिवसांपूर्वीच या दोन्ही विमानसेवा लवकरच सुरू होणार असल्याचे संकेत दिले होते.
