नांदेड| कॉलिटी अश्युरन्स अंतर्गत राबविण्यात येणाऱ्या कायाकल्प कार्यक्रमाच्या अनुषंगाने प्राथमिक आरोग्य केंद्र बारूळ (ता. कंधार, जि. नांदेड) येथे एक्सटर्नल असेसमेंट यशस्वी-रीत्या पार पडले. लातूर विभागीय असेसर टीमने २४ मार्च रोजी सखोल पाहणी करत विविध विभागांचा आढावा घेतला.
या पाहणीसाठी डॉ. हरेश्वर सूळे (वैद्यकीय अधिकारी, प्राथमिक आरोग्य केंद्र वाढवना, जि. लातूर) आणि डॉ. श्यामसुंदर लोखंडे (गुणवत्ता आश्वासन समन्वयक, जि. नांदेड) उपस्थित होते. त्यांचे स्वागत वैद्यकीय अधिकारी डॉ. एच. के. साखरे व डॉ. सागर तातोडे यांनी केले.
जिल्हा आरोग्य अधिकारी डॉ. संगीता देशमुख व तालुका आरोग्य अधिकारी डॉ. रमेश गवाले यांच्या मार्गदर्शनाखाली ही पाहणी पार पडली. यावेळी असेसर टीमने रुग्णालयाच्या बाह्य परिसरातील स्वच्छता, आपत्कालीन कक्ष, आंतररुग्ण विभाग, प्रसूतीगृह, शस्त्रक्रिया विभाग, लसीकरण विभाग तसेच महात्मा ज्योतिराव फुले जन आरोग्य योजना विभागाची पाहणी केली.
तसेच बाह्यरुग्ण विभाग, औषधी विभाग, विविध नोंदी, अहवाल व कायाकल्प चेकलिस्टनुसार आवश्यक बाबींची तपासणी करण्यात आली. आयुष उद्यानासह इतर सुविधा पाहून टीमने समाधान व्यक्त केले. यानंतर सर्व डॉक्टर, कर्मचारी व कार्यालयीन कर्मचाऱ्यांना डॉ. हरेश्वर सूळे व डॉ. श्यामसुंदर लोखंडे यांनी सखोल मार्गदर्शन केले. आरोग्य सहाय्यक श्री येलुरे यांनी टीमचे आभार मानत कमी वेळेत उत्कृष्ट तयारी केल्याबद्दल सर्व कर्मचाऱ्यांचे कौतुक केले.
या कार्यक्रमास डॉ. एच. के. साखरे, डॉ. दीक्षा, डॉ. सागर, डॉ. मुदे, डॉ. अंबिका लाटकर, डॉ. दिग्रे, डॉ. मोहिते, तसेच इतर आरोग्य अधिकारी, कर्मचारी, आरोग्य सेविका, आशा व कर्मचारी वर्ग मोठ्या संख्येने उपस्थित होते. एकूणच, या एक्सटर्नल असेसमेंटमुळे प्राथमिक आरोग्य केंद्र बारूळ येथील आरोग्य सेवा अधिक गुणवत्तापूर्ण व रुग्णाभिमुख होण्यास मदत होणार आहे.