मुल्यसाखळी विकास योजनाअंतर्गत महाडीबीटी पोर्टलवर अर्ज करण्याचे आवाहन – NNL
नांदेड| निविष्ठांचा पुरवठा करण्यासाठी लाभार्थ्यांची निवड महाडीबीटी पोर्टलवर केलेल्या अर्जातून ऑनलाईन पध्दतीने करण्यात येणार आहे. त्यासाठी महाडीबीटी पोर्टलवर १२ जून २०२४ पासून या बाबींच्या टाईल्स उपलब्ध करुन देण्यात आलेल्या आहेत.
बियाणे, औषधे व खते या टाईल अंतर्गत शेतकऱ्यांना अर्ज करता येईल. तरी जास्तीत जास्त शेतकऱ्यांनी mahadbt.maharashtra.gov.in farmer login या वेबसाईटवर अर्ज करावेत व या योजनेचा लाभ घ्यावा, असे आवाहन जिल्हा अधिक्षक कृषि अधिकारी भाऊसाहेब बऱ्हाटे यांनी केले आहे.
कापूस सोयाबिन व इतर तेलबिया आधारित पीक पध्दतीस चालना देवून शेतकऱ्यांच्या उत्पन्नात वाढ करण्यासाठी व कापूस, सोयाबिन व इतर तेलबिया पिकातील मुल्यसाखळीस चालना देण्यासाठी राज्य पुरस्कृत एकात्मिक कापूस सोयाबिन आणि इतर तेलबिया उत्पादकता वाढ व मुल्य साखळी विकासासाठी विशेष कृती योजना सन २०२२-२३ ते २०२४-२५ या तीन वर्षात राबविण्यात येत आहे. सन २०२४-२५ मध्ये योजनेंतर्गत चालू खरीप हंगामात पुढीलप्रमाणे निविष्ठा पुरविण्यात येणार आहेत.
नॅनो युरिया सोयाबीन, नॅनो डीएपी सोयाबीन, नॅनो युरिया कापूस, नॅनो डीएपी कापूस या निविष्ठासाठी अर्ज करण्याचा कालावधी १२ जून ते ३० जून २०२४ असा आहे. तर मेटाल्डीहाइड सोयाबिनसाठी १२ जून ते २३ जूनपर्यत अर्ज करता येतील असे कृषी विभागाने प्रसिद्धीपत्रकाद्वारे कळविली आहे.
