पंजाबमधील हजार सरपंच प्रतिनिधींचे मार्कंड येथे उत्साहात स्वागत

नवीन नांदेड l पंजाब राज्यातील विविध जिल्ह्यांतून आलेल्या सुमारे एक हजार सरपंच प्रतिनिधींचे नांदेड जिल्ह्यातील मार्कंड येथे अत्यंत उत्साहात व आपुलकीने स्वागत करण्यात आले. ग्रामपंचायत कार्यालय मार्कंड, जिल्हा परिषद प्राथमिक शाळा मार्कंड आणि प्रगती वन ग्रामसंघ मार्कंड यांच्या संयुक्त वतीने हा स्वागत समारंभ पार पडला.

दि. २९ जानेवारी ते १ फेब्रुवारी या चार दिवसांच्या अभ्यास दौर्‍याच्या अंतर्गत ३१ जानेवारी रोजी पंजाबमधील सरपंच प्रतिनिधींनी नांदेड जिल्ह्यातील विविध तालुक्यांतील ग्रामपंचायती व पंचायत समितींना भेटी दिल्या. या दौर्‍यात महाराष्ट्र शासनाच्या मुख्यमंत्री समृद्ध पंचायतराज अभियान व महिला सक्षमीकरण कार्यक्रमांतर्गत राबविण्यात येणाऱ्या नाविन्यपूर्ण व आदर्श उपक्रमांचा सखोल अभ्यास करण्यात आला. दोन्ही राज्यांतील ग्रामविकास विषयक कामांची माहिती, अनुभवांची देवाणघेवाण व चर्चा यामुळे हा दौरा अत्यंत फलदायी ठरला.

नांदेड तालुक्यातील ग्रामपंचायत मार्कंड येथे भेट दिल्यानंतर सरपंच प्रतिनिधींचे पुष्पगुच्छ देऊन स्वागत करण्यात आले. यावेळी गावातील पाणी शुद्धीकरण प्रकल्पाची प्रत्यक्ष पाहणी करण्यात आली. त्यानंतर बचतगटामार्फत तयार करण्यात आलेल्या विविध वस्तू व खाद्यपदार्थांच्या स्टॉलना भेट देऊन सरपंच प्रतिनिधींनी बचतगटांनी बनवलेल्या सर्व वस्तूंची खरेदी केली.

याशिवाय गावातील प्रत्येक घरावर मुलीच्या नावाच्या पाट्या लावण्याचा उपक्रम, शाळेला भेट देऊन विद्यार्थ्यांशी संवाद, शालेय शिक्षणाची माहिती तसेच शाळेच्या परसबागेची पाहणी करण्यात आली. या सर्व उपक्रमांबद्दल सरपंच प्रतिनिधींनी समाधान व्यक्त करत विशेष कौतुक केले.

गावातील सभेत मनोगत व्यक्त करताना पंजाबमधील सरपंच प्रतिनिधींनी, “खरंच गावकऱ्यांनी गावातच नंदनवन निर्माण केले आहे,” अशा शब्दांत्‍हासह मार्कंड ग्रामपंचायतीच्या विकासकामांचे भरभरून कौतुक केले.

या कार्यक्रमास यशदा कर्मचारी, नांदेड पंचायत समितीचे विस्तार अधिकारी राजेश केंद्रे, ग्रामपंचायत अधिकारी श्री. शिंदे, मुदखेडे, कदम, यन्नावर, एमएसआरएमएलचे ढवळे व गायकवाड, सरपंच सौ. नेहा बालाजी शिंदे, उपसरपंच आकाश पा. येवले, ग्रामपंचायत सदस्य एकनाथराव येवले, दिगांबर येवले, तंटामुक्ती अध्यक्ष रंगनाथ लामदाडे, शालेय समिती अध्यक्ष बालाजी येवले, ग्रामसंघाच्या अध्यक्ष-उपाध्यक्ष-सचिव लिपिका व रंजना लामदाडे, सर्व बचतगटांच्या पदाधिकारी व सदस्या, शाळेचे मुख्याध्यापक व शिक्षक, अंगणवाडी सेविका व मदतनीस, तसेच नामदेव लामदाडे, बाबुराव बोकारे, भानुदास बोकारे, गंगाधर लामदाडे, हनमंतराव येवले, मधुकर लामदाडे, पांडुरंग लामदाडे, यशवंत भोरगे यांच्यासह बहुसंख्य ग्रामस्थ उपस्थित होते. या अभ्यास दौर्‍यामुळे महाराष्ट्रातील आदर्श ग्रामविकासाचा ठसा पंजाबपर्यंत पोहोचला, असे चित्र यानिमित्ताने दिसून आले.