नांदेड | नांदेड जिल्ह्यात घडलेल्या खळबळजनक खुनाच्या गुन्ह्यात स्थानिक गुन्हे शाखा (LCB), नांदेड यांनी अत्यंत वेगवान व अचूक तपास करत अवघ्या 12 तासांच्या आत आरोपींना अटक करून मोठे यश मिळवले आहे. या धडाकेबाज कारवाईमुळे संपूर्ण जिल्ह्यात एकच खळबळ उडाली असून नांदेड पोलिसांच्या कार्यक्षमतेचे सर्वत्र कौतुक होत आहे.
नांदेड ग्रामीण पोलीस ठाण्याच्या हद्दीत दाखल गुन्हा क्रमांक 109/2026 अंतर्गत भारतीय दंड विधानाच्या कलम 103, 118(1), 115(2), 189(2), 191(2), 191(3) तसेच शस्त्र कायदा कलम 4/25 अन्वये हा गंभीर गुन्हा दाखल करण्यात आला होता.
दिनांक 08 फेब्रुवारी 2026 रोजी पहाटे साडेचारच्या सुमारास ही घटना घडल्यानंतर, पोलीस अधीक्षक कार्यालयाच्या स्पष्ट निर्देशानुसार स्थानिक गुन्हे शाखेने तपासाची सूत्रे हाती घेतली. गोपनीय माहिती, तांत्रिक विश्लेषण व गुप्त बातमीदारांच्या मदतीने विविध ठिकाणी छापे टाकून आरोपींना ताब्यात घेण्यात आले.
या यशस्वी मोहिमेत पोलीस अधीक्षक नांदेड, अपर पोलीस अधीक्षक भोकर, उपविभागीय पोलीस अधिकारी तसेच LCB पथकातील अधिकारी व अंमलदारांनी अत्यंत मोलाची भूमिका बजावली. आरोपींकडून गुन्ह्यात वापरलेली प्राणघातक हत्यारे व इतर मुद्देमाल जप्त करण्यात आला असून पुढील तपास वेगाने सुरू आहे.
नांदेड पोलिसांनी दाखवलेल्या या तत्पर आणि कडक कारवाईमुळे नागरिकांमध्ये सुरक्षिततेची भावना अधिक बळावली असून, गुन्हेगारी प्रवृत्तीला पोलिसांचा स्पष्ट आणि कडक इशारा मिळाला आहे.
