dlip thakur : सोमवारी सकाळी मुसळधार पाऊस पडत असताना देखील नियोजित ६४ व्या महिन्याच्या कायापालट

नांदेड l या उपक्रमाला खंड पडू नये म्हणून धर्मभूषण ॲड. दिलीप ठाकूर यांच्या पुढाकारातून डोक्यावर छत्री धरून ४३ भ्रमिष्ठांची मोफत दाढी कटिंग करून नवीन कपडे,चहा फराळ व शंभर रुपयाची बक्षिसी देण्यात आली.

आर्थिक अडचणीमुळे किंवा वेडसरपणामुळे डोक्याचे जंगल बनलेल्या रस्त्यावरील निराधारांना विश्वासात घेऊन त्यांची कटिंग दाढी करण्याचा ” कायापालट ” हा उपक्रम सहा वर्षांपूर्वी दिलीप ठाकूर यांनी सुरू केला होता. सोमवारी सकाळी सहा वाजता सर्वांची दाढी कटिंग करण्याचा निरोप सर्व बेघरांना आदल्या दिवशीच देण्यात आला होता. पहाटेपासून तुफान पाऊस पडत असल्यामुळे कार्यक्रम रद्द करण्याची परिस्थिती निर्माण झाली होती.

पण संयोजक दिलीप ठाकूर यांनी कार्यक्रम घ्यायचा असा निर्धार केला. माजी मुख्यमंत्री अशोकराव चव्हाण, खासदार डॉ. अजित गोपछडे, भाजपा प्रदेश संघटन मंत्री संजय कोडगे भाजपा अध्यक्ष अमरनाथ राजुरकर, डॉ. संतुकराव हंबर्डे, ॲड. किशोर देशमुख,लायन्स उप प्रांतपाल योगेश जायस्वाल यांच्या मार्गदर्शनाखाली भाजपा महानगर नांदेड , लायन्स क्लब नांदेड सेंट्रल , सन्मित्र फौंडेशन, अमरनाथ यात्री संघाच्या वतीने ६४ व्या महिण्या पासून कायापालट उपक्रम दर महिन्याच्या पहिल्या सोमवारी राबविण्यात येतो. सुरेश शर्मा, शिवा लोट यांनी भर पावसात सर्व रस्ते फिरून योग्य व्यक्तीची निवड केली.

राजू अण्णा पुसनूर व प्रसाद या स्वंयसेवकांनी सर्वांची काळजीपूर्वक कटिंग दाढी केली. गोदावरी नदीला पूर आल्यामुळे काठावरच स्नानासाठी स्वच्छ व मुबलक पाण्याची व्यवस्था कामगार आघाडीचे जिल्हाध्यक्ष सुरेश लोट यांच्यातर्फे करण्यात आली होती. कित्येक महिने अंघोळ न केलेल्या या भ्रमिष्टांना साबण लावून स्नान घालण्यात आले.

सर्वांना नविन अंडरपॅन्ट ,बनियन,टी शर्ट, पँट देण्यात आले.प्रकाश कॅप डेपोचे सुभाष बंग यांच्या तर्फे यावेळी बनियनची व्यवस्था केली होती. स्वच्छ होऊन नवीन कपडे घातल्यामुळे भ्रमिष्टांच्या दिसण्यात अमुलाग्र बदल झाला होता .सर्वांच्या चहा फराळाची व्यवस्था केली. गेल्या महिन्यात अमर राजुरकर यांनी घोषणा केल्यानुसार त्यांच्या तर्फे सर्वांना शंभर रुपयाची बक्षिसी देण्यात आली. डॉ.दी.बा.जोशी,डॉ.अर्जुन मापारे यांनी सर्वांची मोफत वैद्यकीय तपासणी करून योग्य ते ओषधोपचार केले.

कार्यक्रमानंतर महापालिकेचे सदाशिव कंधारे यांच्या मार्गदर्शनाखाली गोवर्धन घाट परिसर झाडून स्वच्छ करण्यात आला.यापुढे नोव्हेंबर महिन्याच्या पहिल्या रविवारी असहाय्य दिसणारे, कचरा वेचणारे, वेडे ,भिकारी, अपंग व्यक्ती आढळल्यास नांदेड शहरातील नागरिकांनी याची माहिती भाजप अथवा लायन्स सदस्यास द्यावी असे आवाहन संयोजक ॲड.दिलीप ठाकूर यांनी केले आहे.कितीही आपत्कालीन परिस्थिती असली तरी दिलीप ठाकूर यांनी आपल्या सेवेत खंड न पडू देत नसल्यामुळे त्यांचे सर्व स्तरातून कौतुक होत आहे.
( छाया:संजयकुमार गायकवाड)