Kothari ; पहाटेच्या मॉर्निंग वॉकदरम्यान भीषण अपघात; कोठारीतील ५० वर्षीय महिलेचा जागीच मृत्यू
माहूर / किनवट| पहाटेचा नियमित व्यायाम एका कुटुंबासाठी काळ ठरला. कोठारी येथील राष्ट्रीय महामार्गावर अज्ञात वाहनाच्या धडकेत ५० वर्षीय महिलेचा जागीच मृत्यू झाल्याची दुर्दैवी घटना गुरुवारी सकाळी घडली. नंदाबाई गोविंदराव पाईकराव असे मृत महिलेचे नाव आहे.
मिळालेल्या माहितीनुसार, नंदाबाई पाईकराव या दररोजप्रमाणे सकाळी सुमारे ५ वाजता मॉर्निंग वॉकसाठी घराबाहेर पडल्या होत्या. कोठारी येथील एमआयडीसी परिसरालगत असलेल्या पेट्रोल पंपासमोरून जात असताना सुसाट वेगाने आलेल्या अज्ञात वाहनाने त्यांना जोरदार धडक दिली. धडक इतकी भीषण होती की त्यांचा जागीच मृत्यू झाला. अपघातानंतर चालक वाहनासह घटनास्थळावरून फरार झाला.
अपघाताचा आवाज ऐकून स्थानिक नागरिकांनी तत्काळ धाव घेतली, मात्र तोपर्यंत उशीर झाला होता. घटनेची माहिती मिळताच Kinwat Police Station चे पथक घटनास्थळी दाखल झाले. पंचनामा करून मृतदेह उत्तरीय तपासणीसाठी शासकीय रुग्णालयात पाठविण्यात आला आहे.
दरम्यान, फरार वाहनचालकाचा शोध घेण्यासाठी परिसरातील सीसीटीव्ही फुटेज तपासले जात असून लवकरच आरोपीला अटक करण्यात येईल, असा विश्वास पोलिसांनी व्यक्त केला आहे.
नागरिकांच्या सुरक्षेचा प्रश्न पुन्हा ऐरणीवर
राष्ट्रीय महामार्गावरील वाहनांचा वेग आणि वाढते अपघात यामुळे नागरिकांच्या सुरक्षेचा प्रश्न पुन्हा एकदा ऐरणीवर आला आहे. सकाळी व्यायामासाठी बाहेर पडणाऱ्या नागरिकांसाठी सुरक्षित पादचारी मार्ग, वेगमर्यादा अंमलबजावणी आणि पोलिसांची गस्त वाढविण्याची मागणी स्थानिकांकडून होत आहे. या दुर्दैवी घटनेमुळे कोठारी परिसरात शोककळा पसरली असून सर्वत्र हळहळ व्यक्त करण्यात येत आहे.
