नांदेड | रामनवमीच्या पावन पर्वानिमित्त यंदा शिर्डी येथे ‘नानक साई अवॉर्ड’चा भव्य सोहळा आयोजित करण्यात आला असून समाजातील विविध क्षेत्रात उल्लेखनीय कार्य करणाऱ्या मान्यवरांचा या सोहळ्यात गौरव करण्यात येणार आहे. साई भक्तांच्या श्रद्धेचे केंद्र असलेल्या शिर्डीत हा प्रेरणादायी कार्यक्रम मोठ्या उत्साहात पार पडणार आहे.
नानक साई फाउंडेशन (Nanak Sai Foundation) तर्फे आयोजित करण्यात येणारा हा सातवा ‘नानक साई अवॉर्ड’ सोहळा येत्या दिनांक २५ मार्च रोजी ‘विशाल साई भक्त संमेलन पार पडणार आहे. या संमेलनात राज्यभरातील साई भक्त, सामाजिक कार्यकर्ते, पत्रकार तसेच विविध क्षेत्रातील मान्यवर मोठ्या संख्येने उपस्थित राहणार आहेत.
फाऊंडेशनचे प्रमुख तथा ज्येष्ठ पत्रकार पंढरीनाथ बोकारे (Pandharinath Bokare) यांनी प्रसारमाध्यमांशी बोलताना सांगितले की, या सोहळ्यात कला, संस्कृती, सामाजिक कार्य, अध्यात्मिक सेवा आणि पत्रकारिता या क्षेत्रात उल्लेखनीय कार्य करणाऱ्या व्यक्ती व संस्थांचा सन्मान केला जाणार आहे. समाजासाठी निःस्वार्थपणे काम करणाऱ्या कार्यकर्त्यांना व्यासपीठ उपलब्ध करून देणे आणि त्यांच्या कार्यातून समाजाला प्रेरणा देणे हा या उपक्रमामागील मुख्य उद्देश आहे.
या भव्य सोहळ्याच्या यशस्वी आयोजनासाठी श्री साईबाबा संस्थान (Shri Saibaba Sansthan Trust), श्री संत कवी दासगणू महाराज भक्त मंडळी (Shri Sant Kavi Dasganu Maharaj Sai Bhakt Mandal), साई मानव सेवा ट्रस्ट (Sai Manav Seva Trust) तसेच साई धाम ट्रस्ट (Sai Dham Trust) यांचे सहकार्य लाभत आहे. सर्वांच्या संयुक्त प्रयत्नातून कार्यक्रम अधिक भव्य आणि संस्मरणीय करण्यासाठी तयारी जोरात सुरू आहे.
रामनवमीच्या शुभमुहूर्तावर आयोजित करण्यात आलेले हे संमेलन साई भक्तांसाठी केवळ धार्मिक कार्यक्रम न राहता समाजसेवा, प्रेरणा आणि सकारात्मक कार्याला प्रोत्साहन देणारे महत्त्वाचे व्यासपीठ ठरणार आहे. समाजासाठी उल्लेखनीय योगदान देणाऱ्यांचा सन्मान करून त्यांच्या कार्याची प्रेरणा जनतेपर्यंत पोहोचवण्याचा हा उपक्रम निश्चितच कौतुकास्पद मानला जात आहे.
