हिमायतनगर, अनिल मादसवार | नांदेड जिल्ह्यातील हिमायतनगर तालुक्यातील मौजे पोटा (बु.) येथील शेतकऱ्यांचे रखडलेले पशुधन खरेदीचे देयक तातडीने द्यावे, या मागणीसाठी कृषी विभाग कार्यालयासमोर सुरू असलेल्या उपोषणाला आज आक्रमक वळण लागले. प्रशासनाकडून दिरंगाई होत असल्याचा आरोप करत शेतकऱ्यांनी थेट कृषी कार्यालयाच्या पायरीवरच प्रमुख उपोषणकर्ते संतोष फुलेवार यांना आंघोळ घालून निषेध नोंदवला.
गेल्या चार दिवसांपासून हिमायतनगर तालुका कृषी अधिकारी कार्यालयासमोर 45 शेतकऱ्यांचे आमरण उपोषण सुरू आहे. मात्र “गेंड्याची कातडी पांघरलेल्या अधिकाऱ्यांकडून” शेतकऱ्यांच्या मानधनाबाबत चालढकल सुरू असल्याचा आरोप आंदोलनकर्त्यांनी केला. रखडलेली पशुधन खरेदीची देयके तात्काळ लाभार्थ्यांच्या खात्यात वर्ग करावीत, अन्यथा आंदोलन तीव्र करण्यात येईल, असा इशारा देण्यात आला.
यावेळी आंदोलनकर्त्यांनी देयक प्रक्रियेत कथित हेराफेरीचा आरोप करत संबंधित तीन अधिकाऱ्यांवर तातडीने निलंबनाची कारवाई करण्याची मागणी केली. “आता तरी प्रशासनाने जागे व्हावे, अन्यथा आंदोलन आणखी तीव्र करू,” असा इशारा शेतकरी प्रतिनिधींनी दिला. दरम्यान, या प्रकारामुळे कृषी कार्यालय परिसरात तणावपूर्ण वातावरण निर्माण झाले असून, प्रशासनाची पुढील भूमिका काय..? असेल याकडे तालुक्याचे लक्ष लागले आहे.
आमदार बाबुराव कदम कोहळीकर यांची भेट
कृषी कार्यालय, हिमायतनगर येथे मौजे पोटा येथील शेतकरी आपल्या हक्काच्या अनुदान व लाभासाठी आमरण उपोषणाला बसले आहेत. शेतकऱ्यांच्या या आंदोलनाची माहिती मिळताच हदगाव–हिमायतनगर विधानसभा मतदारसंघाचे आमदार बाबुराव कदम कोहळीकर यांनी उपोषणस्थळी भेट देऊन शेतकऱ्यांशी संवाद साधला. त्यांनी संबंधित अधिकाऱ्यांकडून माहिती घेत हा प्रश्न अधिवेशनात उपस्थित करून न्याय मिळवून देण्यासाठी प्रयत्न करणार असल्याचे आश्वासन दिले. त्यांच्या भेटीनंतर प्रकरणाला राजकीय वळण मिळाले असून, कृषी कार्यालयातील कामकाजावर प्रश्नचिन्ह उपस्थित होत आहे.
उपोषणकर्त्यांनी आरोप केला आहे की, काही अधिकारी व कर्मचारी कागदपत्रांची जुळवा जुळव करून रात्रीला कार्यालयात येऊन गैरव्यवहार झाकण्याचा प्रयत्न करत आहेत . त्यामुळे पोटा गावासह इतर गावातील विविध योजनांमधील कामकाजाचीही चौकशी व्हावी, अशी मागणी त्यांनी केली आहे. वादळी वारे, विजांचा कडकडाट ऊन, पावसाची तमा न बाळगता चौथ्या दिवशीही उपोषण सुरू असल्याने शेतकऱ्यांच्या प्रकृतीची काळजी व्यक्त केली जात आहे.