नांदेड | जिल्ह्यातील अवैध वाळू उत्खनन व वाहतुकीवर आळा घालण्यासाठी नांदेड ग्रामीण पोलिसांनी मोठी कारवाई करत ८ आरोपींविरुद्ध गुन्हा दाखल केला असून तब्बल १ कोटी ६५ लाख ४६ हजार रुपयांचा मुद्देमाल जप्त केला आहे. या कारवाईमुळे वाळू माफियांमध्ये मोठी खळबळ उडाली आहे.
पोलीस अधीक्षकांच्या मार्गदर्शनाखाली ‘ऑपरेशन फ्लश आऊट’ अंतर्गत ही कारवाई करण्यात आली. १९ मार्च रोजी मध्यरात्रीच्या सुमारास नांदेड परिसरात सापळा रचून अवैधरित्या वाळू उत्खनन व वाहतूक करणाऱ्या वाहनांवर धाड टाकण्यात आली.
कारवाईदरम्यान पोलिसांनी टिपर, ट्रॅक्टर, हायवा, इंजन, जेसीबीसारखी यंत्रसामग्री तसेच वाळूसह मोठ्या प्रमाणात साहित्य जप्त केले
प्राथमिक तपासात संबंधित आरोपींकडून शासनाची कोणतीही परवानगी न घेता वाळू उत्खनन सुरू असल्याचे उघड झाले आहे.
या प्रकरणी भारतीय दंड संहिता तसेच पर्यावरण व खनिज कायद्यांनुसार गुन्हे दाखल करण्यात आले असून पुढील तपास सुरू आहे.
पोलीस प्रशासनाचा इशारा: अवैध वाळू उत्खनन व वाहतूक करणाऱ्यांवर कठोर कारवाई करण्यात येईल. नागरिकांनी अशा प्रकारच्या बेकायदेशीर हालचालींची माहिती तात्काळ पोलिसांना द्यावी.
