हिमायतनगर, अनिल मादसवार| भारतीय प्रजासत्ताक दिनानिमित्त २६ जानेवारी रोजी हिमायतनगर जिल्हा नगरपंचायत कार्यालयात ७७ वा वर्धापन दिन मोठ्या उत्साहात साजरा करण्यात आला. यावेळी नवनिर्वाचित नगराध्यक्ष शेख रफिक शेख मेहबूब यांच्या हस्ते ध्वजारोहण करण्यात आले.
ध्वजारोहणानंतर उपस्थितांना संबोधित करताना नगराध्यक्ष शेख रफिक यांनी सर्व नागरिकांना प्रजासत्ताक दिनाच्या हार्दिक शुभेच्छा दिल्या तसेच कार्यक्रमास उपस्थित राहिल्याबद्दल सर्वांचे आभार मानले. या कार्यक्रमास प्रभारी मुख्याधिकारी ताडेवाड, सर्व नवनिर्वाचित नगरसेवक, गावातील प्रतिष्ठित नागरिक, नगरपंचायतीचे अधिकारी व कर्मचारी, पोलीस अधिकारी, जिल्हा परिषद कन्या शाळेचे विद्यार्थी व शिक्षक, अंगणवाडी कर्मचारी तसेच पत्रकार बांधव मोठ्या संख्येने उपस्थित होते.
लेझिम सादरीकरणाने वेधले लक्ष
ध्वजारोहण कार्यक्रमात जिल्हा परिषद कन्या शाळेच्या विद्यार्थ्यांनी देशभक्तीपर गीतांवर सादर केलेल्या लेझिम नृत्याने उपस्थितांची मने जिंकली. विद्यार्थ्यांच्या शिस्तबद्ध व उत्साही सादरीकरणामुळे संपूर्ण परिसर देशभक्तीमय वातावरणाने भारावून गेला होता.
