हिमायतनगर, अनिल मादसवार | श्री परमेश्वर मंदिरातील तसेच वडाच्या झाडाखालील मानाच्या गणपतीची भव्य पालखी मिरवणूक टाळ-मृदंगाच्या गजरात आणि भारूड-भजनीच्या भक्तिमय वातावरणात उत्साहात पार पडली.
मिरवणुकीत मोठ्या संख्येने भाविक सहभागी झाले होते. मिरवणुकीदरम्यान “गणपती बाप्पा मोरया, मंगलमूर्ती मोरया!” च्या जयघोषाने परिसर दुमदुमून गेला. महिला व पुरुष भजनी मंडळांच्या सहभागामुळे मिरवणुकीला पारंपरिक भक्तीमय स्वरूप प्राप्त झाले होते.
गणेशभक्तांच्या स्वागतासाठी मिरवणूक मार्गावर ठिकठिकाणी प्रसाद व पाण्याचे वाटप करण्यात आले. भक्तिभाव आणि शिस्तबद्ध वातावरणात गणपती बाप्पाला श्री कनकेश्वर तलावाजवळील विहिरीत शांततेत विसर्जित करून निरोप देण्यात आला.
ही शोभायात्रा श्री परमेश्वर मंदिर ट्रस्टचे उपाध्यक्ष महावीरचंद श्रीश्रीमाळ व सचिव अनंता देवकते यांच्या नेतृत्वाखाली काढण्यात आली. यावेळी मंदिर ट्रस्टचे सर्व संचालक, महिला-पुरुष भजनी मंडळांचे सदस्य, भाविक तसेच नागरिकांचा उत्स्फूर्त सहभाग लाभला.
मिरवणुकीच्या माध्यमातून परंपरा, भक्ती आणि सामाजिक एकोप्याचे दर्शन घडले. गणेशोत्सवाच्या सांगतेनिमित्त भाविकांमध्ये उत्साहाचे वातावरण होते.
