नांदेड | नांदेड परिक्षेत्रात अवैध धंद्यांवर लगाम घालण्यासाठी पोलीस उप महानिरीक्षक शहाजी उमाप यांच्या मार्गदर्शनाखाली विशेष पथकाने जोरदार धडक कारवाया करत गुन्हेगारीला मोठा धक्का दिला आहे.
🔴 लोह्यात मटका अड्ड्यावर छापा
दिनांक 18 मार्च 2026 रोजी लोहा शहरातील छत्रपती शिवाजी चौक परिसरात एका शेडमध्ये सुरू असलेल्या मटका बुकीवर पोलिसांनी अचानक छापा टाकला. या कारवाईत तब्बल 17 आरोपींना ताब्यात घेण्यात आले. त्यांच्या कडून ₹62,600 रोख व 3 मोबाईल असा ₹96,100 चा मुद्देमाल जप्त करण्यात आला.
या प्रकरणात धक्कादायक बाब म्हणजे, स्थानिक नगरसेवकाचा सहभाग उघडकीस आल्याने शहरात खळबळ उडाली आहे. आरोपींवर महाराष्ट्र जुगार कायद्याअंतर्गत गुन्हा दाखल करण्यात आला असून पुढील तपास सुरू आहे.
🔴 पालम येथे अवैध रेती वाहतूक पकडली
त्याच पथकाने 17 मार्च रोजी पालम-पेठ पिंपळगाव रोडवर कारवाई करत अवैधरीत्या रेती वाहतूक करणारा हायवा ट्रक जप्त केला. या कारवाईत 4 ब्रास वाळूसह सुमारे ₹10.14 लाखांचा मुद्देमाल हस्तगत करण्यात आला. एक आरोपी ताब्यात असून त्याच्यावर गुन्हा दाखल करण्यात आला आहे.
एकूण कारवाईचा आढावा
या दोन मोठ्या कारवायांमध्ये पोलिसांनी एकूण: ₹62,600 रोख, 3 मोबाईल, 1 हायवा, 4 ब्रास वाळू असा तब्बल ₹11.10 लाखांचा मुद्देमाल जप्त केला आहे.
पथकाची कामगिरी उल्लेखनीय
पोलीस उपनिरीक्षक पंकज इंगळे यांच्यासह पथकातील सर्व अधिकाऱ्यांनी ही कारवाई यशस्वीपणे पार पाडली. त्यांच्या या धाडसी कामगिरीबद्दल पोलीस उप महानिरीक्षक शहाजी उमाप यांनी विशेष अभिनंदन केले आहे.
‘खबर’ हेल्पलाइन सुरू
अवैध व्यवसायांविरोधात नागरिकांचा सहभाग वाढावा यासाठी पोलिसांनी ‘खबर’ हेल्पलाइन (📞 9150100100) सुरू केली आहे. नागरिकांनी आपल्या परिसरातील गैरप्रकारांची माहिती फोन किंवा व्हॉट्स अॅपद्वारे देण्याचे आवाहन करण्यात आले असून, माहिती देणाऱ्याची ओळख पूर्णतः गुप्त ठेवली जाणार आहे. अवैध धंदे बंद करा, अन्यथा कारवाईला सामोरे जा! असा इशारा पोलिसांनी दिला आहे.