Politics news : हिमायतनगरात नगरपंचायत निवडणुकीत काँग्रेसच्या संभाव्य उमेदवारांच्या चर्चेत ज्ञानेश्वर शिंदेच्या नावाची जोरदार चर्चा
हिमायतनगर, अनिल मादसवार| आगामी होऊ घातलेल्या नगरपंचायत निवडणुकीची राजकीय चर्चा दिवसेंदिवस वाढत असताना, शहरात एक नवा राजकीय मुद्दा जोरदार चर्चेत येऊ लागला आहे. मागील कार्यकाळात मुस्लिम समाजातील व्यक्ती नगराध्यक्ष पदावर विराजमान होती, मात्र यावेळी “हिंदू समाजाचा नगराध्यक्ष व्हावा!” अशी मागणी जनतेतून जोर धरताना दिसत आहे. या पार्श्वभूमीवर स्थानिक राजकारणात नवी समीकरणं आकार घेत असून, काँग्रेस पक्षाकडून ज्ञानेश्वर शिंदे हे संभाव्य उमेदवार म्हणून चर्चेत आले आहेत. दीर्घकाळ सामाजिक कार्यात सक्रिय राहिलेले, संघटनेचा भक्कम अनुभव असलेले आणि सर्वसामान्य नागरिकांमध्ये स्वतःची वेगळी ओळख निर्माण केलेले ज्ञानेश्वर शिंदे हे नगराध्यक्ष पदाची निवडणूक लढविण्यासाठी सज्ज झाले असल्याची माहिती मिळाली आहे.
मिळालेल्या माहितीनुसार, शिंदे यांनी काँग्रेस पक्षाच्या वरिष्ठ नेत्यांशी संपर्क साधून उमेदवारीसाठी जोरदार फिल्डिंग लावली आहे. स्थानिक पातळीवर अनेक वर्षे पक्षनिष्ठेने काम करताना त्यांनी संघटनात्मक बळ आणि लोकसंपर्क या दोन्ही आघाड्यांवर मजबूत पकड निर्माण केली आहे. काँग्रेसमधून अनेक इच्छुकांची नावे समोर आली असली तरी, पक्षाकडून शिंदे यांनाच हिरवा कंदील मिळण्याची शक्यता अधिक असल्याची चर्चा आहे.
अलीकडच्या काही दिवसांत फेसबुक, व्हॉट्सअॅप ग्रुप्स आणि स्थानिक सोशल मीडिया मंचांवर “हिंदूचा नगराध्यक्ष हवा!” असा आवाज बुलंद होताना दिसत आहे. या भावनेच्या पार्श्वभूमीवर शिंदे यांच्या नावाभोवती चर्चेचं केंद्र निर्माण झालं आहे. अनेकांनी त्यांचं नाव पुढे करत “विकासाभिमुख, सर्वसमावेशक आणि स्वच्छ प्रतिमेचं नेतृत्व” म्हणून त्यांचा उल्लेख केला आहे.
हिमायतनगर नगरपंचायतच्या राजकारणात मागील काही निवडणुकांपासून धार्मिक आणि जातीय समीकरणे निर्णायक ठरत आली आहेत. यावेळी “हिंदू समाजाचं नेतृत्व कोण करणार?” हा प्रश्न राजकीय चर्चेच्या केंद्रस्थानी आला आहे. काँग्रेसकडून जर ज्ञानेश्वर शिंदे यांना उमेदवारी मिळाली, तर ते या भावनेला चालना देत निवडणुकीचा रंग बदलू शकतात, असा राजकीय अंदाज व्यक्त केला जात आहे. स्थानिक नागरिकांपैकी काहींचं मत आहे की, “शहरातील सर्व समाजांचा विकास करणारा, सर्वांना समानतेने न्याय देणारा आणि स्वच्छ प्रतिमेचा नेता नगराध्यक्ष व्हावा. त्या दृष्टीने ज्ञानेश्वर शिंदे हे योग्य पर्याय ठरू शकतात,” असं अनेकांनी सांगितलं.
नांदेड जिल्ह्यातील हिमायतनगर शहराची राजकीय स्थिती पाहता काँग्रेस, भाजप, राष्ट्रवादी काँग्रेस आणि शिवसेना (उद्धव व शिंदे गट) या सर्व पक्षांमध्ये उमेदवार ठरविण्याची चुरस सुरू आहे. मात्र, काँग्रेसकडून जर शिंदे यांना अधिकृत उमेदवारी मिळाली, तर हिंदू मतदारवर्गाचं मोठं एकत्रीकरण होऊ शकतं, अशी राजकीय वर्तुळात चर्चा आहे. हिमायतनगर नगरपंचायत निवडणुकीत “हिंदूचा नगराध्यक्ष” ही मागणी आणि त्या अनुषंगाने निर्माण झालेली चर्चा यामुळे राजकीय वातावरण तापू लागलं आहे. काँग्रेसकडून ज्ञानेश्वर शिंदे यांना उमेदवारी मिळाल्यास, ही निवडणूक अत्यंत चुरशीची, रणनीतीपूर्ण आणि रोचक ठरण्याची चिन्हे स्पष्टपणे दिसू लागली आहेत.
