Kavad Yatra : रामजी की निकली सवारी… श्रावणातील भव्य कावड यात्रेने भगवेमय वातावरण
हिमायतनगर, अनिल मादसवार| श्रावण महिन्यातील शेवटच्या सोमवारी येथील बजरंग दल शाखेच्या पुढाकारातून सहस्रकुंड धबधबा ते हिमायतनगर (वाढोणा) दरम्यानची भव्य पायी कावड यात्रा उत्साहात काढण्यात आली. मुसळधार पावसातही ४०० ते ५०० कावडधारी युवकांनी भगवे झेंडे आणि कावड घेऊन सहभाग नोंदवला.
दरवर्षीप्रमाणे याही वर्षी पवित्र श्रावण मासात वाढोणा येथील बजरंग दल तर्फे आयोजित भव्य कावड यात्रेच्या पूर्व दिनी रविवारी सायंकाळी शेकडो युवक पैनगंगा नदीकाठावरील सहस्त्रकुंड बाणगंगा महादेव मंदिराकडे प्रस्थान झाले. सकाळी अभ्यंगस्नान करून महादेवाचे दर्शन व महाआरती करण्यात आली.
यावेळी श्री परमेश्वर मंदिर ट्रस्टच्या वतीने सहस्रकुंड येथे कावडधाऱ्यांचे भव्य स्वागत करून ट्रस्टच्या वतीने सर्व कावडधारी युवकांना टीशर्ट वितरित करण्यात आले. त्यानंतर “हर हर महादेव… जय श्रीराम” या घोषणांनी गगन दुमदुमवत कावड यात्रा सुरू झाली. या यात्रेच्या अगदी अग्रभागी असलेली प्रभू श्रीरामाची भव्य मूर्ती हे आकर्षण ठरले.
सहस्रकुंड येथून निघालेल्या कावड यात्रेचे इस्लापूर, खैरगाव, वडगाव, कार्ला आदींसह मार्गातील विविध गावकऱ्यांनी उत्साहात स्वागत झाले. तसेच कावडधाऱ्यांसाठी फराळाचे आयोजन करण्यात आले होते. कावड यात्रा हिमायतनगर वाढोणा शहरात दाखल होताच श्री परमेश्वर मंदिर परिसरात भाविकांची प्रचंड गर्दी झाली. हजारो भक्तांनी या निमित्ताने दर्शन लाभ घेतला. यावेळी आमदार बाबुराव कदम कोहळीकर यांच्यातर्फे भाविक भक्ताना महाप्रसादाचे वाटप करण्यात आले. श्रावण महिन्यातील शेवटच्या सोमवारी संपन्न झालेली ही कावड यात्रा भगव्या झेंड्यांनी आणि भक्तिमय घोषणांनी दुमदुमली. कावड यात्रा आणि श्रावण सोमवार असल्याने मुसळधार पावसातही भाविकांचा उत्साह ओसंडून वाहत होता.
