परभणी| पाथरी शहरातील जुगार अड्डे व मटका बुकीवर पोलिसांनी मोठी कारवाई करत एकूण 13 आरोपींना ताब्यात घेतले असून, सुमारे 1 लाख 49 हजार 800 रुपयांचा मुद्देमाल जप्त करण्यात आला आहे. ही कारवाई पोलीस उप महानिरीक्षक शहाजी उमाप यांच्या मार्गदर्शनाखाली करण्यात आली.
मिळालेल्या माहितीनुसार, 23 मार्च रोजी पोलिसांच्या विशेष पथकाने पाथरी शहरातील रशिद कॉलनी परिसरात धाड टाकली. येथे एका शेडमध्ये ‘तिर्रट’ नावाचा जुगार सुरू असल्याचे आढळून आले. या ठिकाणी 8 जणांना ताब्यात घेण्यात आले असून, त्यांच्याकडून 33,200 रुपयांची रोकड व 7 मोबाईल असा 83,200 रुपयांचा मुद्देमाल जप्त करण्यात आला. याप्रकरणी पाथरी पोलीस ठाण्यात महाराष्ट्र जुगार कायद्यान्वये गुन्हा नोंदविण्यात आला आहे.
त्यानंतर दुसरी कारवाई नायब हॉटेलजवळील परिसरात करण्यात आली. येथे ‘फन टारगेट चक्री’ (बिंगो) नावाचा ऑनलाइन जुगार सुरू असल्याचे उघडकीस आले. या ठिकाणी 5 आरोपींना ताब्यात घेण्यात आले असून, 36,600 रुपयांची रोकड, एक मोबाईल व संगणक साहित्य असा 66,600 रुपयांचा मुद्देमाल जप्त करण्यात आला आहे. याप्रकरणीही पाथरी पोलीस ठाण्यात गुन्हा दाखल करण्यात आला आहे.
दोन्ही कारवायांमध्ये एकूण 69,800 रुपयांची रोकड, 8 मोबाईल, तसेच संगणक व इतर साहित्य जप्त करण्यात आले आहे. या प्रकरणांचा पुढील तपास पोलीस कर्मचारीांकडे सोपविण्यात आला आहे. या धाडीत पोलीस उपनिरीक्षक पंकज इंगळे यांच्यासह इतर पोलीस कर्मचाऱ्यांनी सहभाग घेतला. पथकाच्या कामगिरीबद्दल पोलीस उप महानिरीक्षक शहाजी उमाप यांनी त्यांचे कौतुक केले आहे.
दरम्यान, अवैध व्यवसायांविरोधात कारवाईसाठी पोलिसांनी ‘खबर’ हेल्पलाइन सुरू केली असून, नागरिकांनी 91 50 100 100 या क्रमांकावर फोन किंवा व्हॉट्सअॅपद्वारे माहिती देण्याचे आवाहन करण्यात आले आहे.
