नांदेड| आपले सरकार सेवा केंद्र वाटपाची संपूर्ण प्रक्रिया आता ऑनलाईन पद्धतीने राबविण्यात येणार असल्याची माहिती जिल्हा प्रशासनाकडून देण्यात आली आहे. अर्जदारांनी सादर केलेल्या कागदपत्रांच्या आधारे शासन निर्णयानुसार गुणांकन करून निवड केली जाणार आहे.
या प्रक्रियेत शैक्षणिक पात्रता व अनुभवाला महत्त्व देण्यात आले आहे. कोणत्याही शाखेचा पदवीधर असल्यास ३० गुण, पदव्युत्तर असल्यास २५ गुण आणि सीएससी (कॉमन सर्व्हिस सेंटर) चालविण्याचा अनुभव असल्यास २५ गुण देण्यात येणार आहेत.
समान गुण असल्यासच मुलाखत – एखाद्या गावासाठी एकापेक्षा अधिक अर्जदारांचे गुण समान असल्यासच मुलाखत घेतली जाणार आहे. मुलाखतीसाठी एकूण २० गुण निश्चित करण्यात आले असून, त्यात तांत्रिक ज्ञानासाठी ६ गुण, लोकसेवा हक्क अधिनियम २०२५चे ज्ञानासाठी ४ गुण आणि सामान्य ज्ञान, व्यक्तिमत्व व सामाजिक कार्यासाठी १० गुण राखीव आहेत.
उच्चस्तरीय समितीद्वारे निवड प्रक्रिया – मुलाखत प्रक्रिया जिल्हाधिकारी यांच्या अध्यक्षतेखालील उच्चस्तरीय समितीद्वारे पार पडणार आहे. या समितीत पोलीस अधीक्षक, जिल्हा परिषदेचे मुख्य कार्यकारी अधिकारी, नांदेड-वाघाळा महानगरपालिकेचे आयुक्त, तसेच विविध विभागांचे वरिष्ठ अधिकारी सदस्य म्हणून सहभागी असणार आहेत. निवासी उपजिल्हाधिकारी हे सदस्य सचिव म्हणून काम पाहतील.
अर्जदारांना प्रशासनाचे आवाहन – अर्जदारांनी प्रक्रिया, सूचना व अद्ययावत माहिती जाणून घेण्यासाठी जिल्ह्याच्या अधिकृत संकेतस्थळाला नियमित भेट द्यावी. अनावश्यकपणे कार्यालयाशी संपर्क साधू नये, असे आवाहन जिल्हा प्रशासनाने केले आहे. या ऑनलाईन प्रक्रियेमुळे सेवा केंद्र वाटपात पारदर्शकता वाढणार असून पात्र उमेदवारांना न्याय मिळण्याची अपेक्षा व्यक्त केली जात आहे.
