हिमायतनगर,अनिल मादसवार| हदगाव – हिमायतनगर तालुक्यात विधानसभा निवडणूकीच्या तोंडावर विविध विकास कामाच्या भूमिपूजनाचा धुमधडाका सुरू असून, काँग्रेसचे विद्यमान आमदार माधवराव पाटील जवळगावकर व शिवसेना शिंदे गटाचे जिल्हाप्रमुख बाबुराव कदम कोहळीकर यांच्यात मोठी स्पर्धा लागल्याचे चित्र या मतदार संघात दिसून येत आहे.
काँग्रेस, राष्ट्रवादी शरद पवार गट व शिवसेना उद्धव ठाकरे गट मित्र पक्ष महाविकास आघाडीकडून विद्यमान आमदार माधवराव पाटील जवळगावकर हे निवडणूक लढविण्यास इच्छुक आहेत. त्यांच्याच काँग्रेसच्या महिला प्रदेश उपाध्यक्षा डॉ.रेखाताई पाटील चव्हाण गोर्लेगावकर, काँग्रेसचे माजी तालुकाध्यक्ष विकास पाटील देवसरकर यांनी पण निवडणूक लढविण्यासाठी सज्ज असल्याचे दाखवून देत तशी तयारी या मतदार संघात सुरु केली आहे. आगामी विधानसभा निवडणूक हरणाच्या गतीने जवळ येत असल्याने सर्वच पक्ष संघटना अलर्ट झाल्या आहेत. हदगाव हिमायतनगर विधानसभा मतदार संघात महाविकास आघाडी व महायुतीच्या उमेदवारातच सरळ सरळ लढत होणार असल्याचे चित्र सध्यातरी स्पष्ट आहे. भाजपा, शिवसेना शिंदे गट व इतर मित्रपक्ष महायुतीकडून शिवसेना शिंदे गट जिल्हाप्रमुख बाबुराव कदम कोहळीकर, भाजपाचे गजानन तुप्तेवार, लताताई फाळके, राष्ट्रवादी काँग्रेस अजित पवार गटाकडून व्यंकटेश पाटील हे सुद्धा इच्छुक आहेत. महाविकास आघाडीत मात्र इच्छुक उमेदवारांची संख्या दिवसेंदिवस वाढतच आहे. तर महायुती कडून उमेदवाराची संख्या तशी कमीच आहे.
भाजपला जागा सोडण्याची मागणी भाजप कार्यकर्ते व पदाधिकारी करीत असले तरी भाजपकडे महाविकास आघाडीच्या तुलनेत प्रभावी व तोडीचा चेहरा नाही. म्हणून कोहळीकर यांचे नाव महायुती कडून सध्यातरी निश्चित मानले जात असले तरी भाजपाचे गजानन तुप्तेवार, तात्याराव पाटील वाकोडे, लताताई फाळके आणि राष्ट्रवादी काँग्रेस अजित पवार गटाकडून व्यंकटेश पाटील हे सुद्धा इच्छुक आहेत. हा मतदार संघ राष्ट्रवादीला सोडण्यात यावा अशी मागणी होत असून, भाजपाचे कर्तायकर्ते देखील हदगाव विधानसभा भाजपाला सोडण्यात यावा अशी मागणी जोर धरून आहेत. तर महाविकास आघाडीतील चित्र मात्र वेगळे पहावयास मिळत आहे. महाविकास आघाडीकडून प्रभावी नेते माजी खासदार तथा तत्कालीन आमदार सुभाष वानखेडे हे उद्धव ठाकरे गटाच्या शिवसेनेकडून इच्छुक आहेत. इच्छुकच नाही तर दावेदारी पक्की असल्याचेही ते सांगत आहेत.
तर ऐन निवडणूकीच्या तोंडावर भाजपला अखेरचा जयश्रीराम करून माजी केंद्रीय ग्रामीण विकास मंत्री श्रीमती सूर्यकांताताई पाटील ह्या स्वगृही परतल्या असून, त्या शरद पवार गटाच्या राष्ट्रवादी काँग्रेस पक्ष महाविकास आघाडीकडून इच्छुक आहेत. हदगाव – हिमायतनगर विधानसभा निवडणूक लढविण्याच्या उद्देशाने त्या स्वगृही परतल्या असल्याचे बोलले जात आहे. तसेच वंचित बहुजन आघाडी कडून हिदायत खान, दिलीप राठोड, स्वराज्य पक्ष संघटनेकडून माधव देवसरकर, बहुजन समाज पार्टी, मनोज जरांगे पाटील यांच्याकडून देखील अनेकजण निवडणूक लढविण्यासाठी इच्छुक असल्याचे दिसून येत आहे. तसेच इतर विविध पक्षाकडूनही विधानसभा निवडणुकीची तयारी सुरु आहे. एकूणच निवडणूक कधी लागतील याकडे सर्वांचे लक्ष लागले असल्याचे चित्र पाहावयास मिळते आहे.
विधानसभा निवडणुकीची उमेवारी मिळविण्यासाठी मुंबईत सध्या खलबते सुरु आहेत. मात्र एकंदरीत या मतदार संघात महाविकास आघाडीकडून इच्छुकांची संख्या भरमसाठ झाली असून, विद्यमान आमदार माधवराव पाटील जवळगावकर यांना तिकीट मिळविण्यासाठी मोठी स्पर्धा करावी लागणार एवढे मात्र निश्चित मानले जात आहे. हे असे असले तरी निवडणूकीच्या तोंडावर या मतदार संघात विकास कामाच्या भूमिपूजनाचा धुमधडाका सुरू करून आमदार माधवराव पाटील जवळगावकर व शिवसेनेचे जिल्हाप्रमुख बाबुराव कदम कोहळीकर यांच्यात मात्र मोठी स्पर्धा लागल्याचे चित्र दिसून येत आहे. जनतेच्या अपेक्षेप्रमाणे गेल्या चार साढेचार वर्षांत कामे झाली नाहीत. मात्र निवडणूकीच्या तोंडावर होत असलेले भूमिपूजन सोहळे मात्र चर्चेचा विषय ठरत आहेत.
सध्या महाराष्ट्रात महायुतीची सत्ता आहे, त्यामुळे मोठ्या प्रमाणात विकास कामासाठी हदगाव – हिमायतनगर मतदार संघात निधी उपलब्ध होत आहे. मात्र हदगाव हिमायतनगर मध्ये काँग्रेसचे वर्चस्व असल्याने त्यांना विश्वासात घेतल्याशिवाय कामे होऊ शकत नाहीत हि सत्य परिस्थिती आहे. म्हणून विकास कामाच्या निधीतून कोणी…. कोणत्या भागाचे उदघाटन करायचे आणि आगामी निवडणुकीत जनतेची मत कशी पदरात पाडून घ्यायची याबाबत देखील तडजोड केली जात आहे. म्हणूनच विकास काम देखील वाटून घेऊन विद्यमान आमदार आणि गुडघ्याला बाशिंग बांधून बसलेले भावी आमदार भूमिपूजन करत असल्याची चर्चा राजकीय गोटात होते आहे. त्यामुळे दोन्ही नेत्याला सोडून मतदार जनता आता नव्या चेहऱ्याला संधी देण्याच्या तयारीत असल्याचे बोलले जात असून, तशी परिस्थिती सध्या महाराष्ट्रात सुरु असलेल्या मराठा आरक्षणाच्या मुद्द्यावरून दिसून येत आहे.
