नांदेड| हदगाव-हिमायतनगर मतदारसंघातील स्वराज्य पक्षाचे उमेदवार माधवराव पाटील देवसरकर यांच्या वतीने आज तामसा येथे समाज उपयोगी नेत्ररोग शिबिर व मोफत शस्त्रक्रिया कार्यक्रमाचे आयोजन करण्यात आले होते. या कार्यक्रमात स्वराज्य पक्षाचे अनेक पदाधिकारी तसेच स्थानिक नागरिकांनी उत्स्फूर्तपणे सहभाग घेतला. वयोवृद्ध माता-भगिनींनी मोठ्या संख्येने उपस्थित राहून आपली नेत्र तपासणी करून शस्त्रक्रियेसाठी मोफत शिबिराचा लाभ घेतला.
स्वराज्य पक्ष नेहमीच समाजाच्या तळागाळातील लोकांसाठी कार्य करत आला आहे, आणि या कार्यक्रमाच्या माध्यमातून पक्षाची सेवावृत्ती पुन्हा एकदा अधोरेखित झाली. हदगाव-हिमायतनगर मतदारसंघातील जनतेच्या समस्यांचे निराकरण करण्यासाठी, विशेषतः आरोग्य, शिक्षण आणि रोजगाराच्या बाबतीत, स्वराज्य पक्षाने एक ठोस धोरण आखले आहे. पक्षाचा उद्देश केवळ निवडणुकीत विजय मिळवणे नसून, मतदार संघातील सर्वसामान्य नागरिकांचे जीवनमान उंचावण्यासाठी आणि त्यांची सामाजिक-आर्थिक प्रगती साधण्यासाठी कार्य करणे आहे.
कार्यक्रमात उपस्थित स्वराज्य पक्षाचे नेते माधवराव पाटील देवसरकर यांनी आपल्या भाषणात सांगितले की, “हदगाव-हिमायतनगर मतदारसंघाच्या जनतेच्या समस्या जाणून घेतल्या आहेत, आणि आम्ही त्या सोडवण्यासाठी सज्ज आहोत. आरोग्य क्षेत्रातील सेवेचा भाग म्हणून आजचे नेत्ररोग शिबिर हे समाजोपयोगी कार्यक्रमांच्या मालिकेतील पहिले पाऊल आहे. येणाऱ्या काळात रोजगार निर्माण करणे, शिक्षणाच्या सुविधा वाढवणे, आणि शेतकऱ्यांच्या हिताचे धोरण राबवणे हे आमचे प्राधान्य राहणार आहे. स्वराज्य पक्षाचे ध्येय सर्वसमावेशक विकास साधून स्वावलंबी समाज निर्माण करणे आहे.”
यावेळी स्वराज्य पक्षाचे अन्य पदाधिकारी सदा पाटील, बालाजी पाटील कराळे, मारुती पाटील पवार, गजानन पाटील आष्टीकर, पवन पाटील मोरे, कृष्णा पाटील हडपकर, आकाश गोधले, शिंदे पाटील, शिंदे अमोल वानखेडे, माधव वानखेडे, देवानंद पाटील, रवीशेठ बंडेवार, विलास चव्हाण, बालाजी तवर, नेताजी पाटील, शिवकांत सूर्यवंशी, रोहित सावकार यांसह अनेक मान्यवर उपस्थित होते. स्वराज्य पक्षाने आगामी निवडणुकीत जनतेच्या विश्वासावर उभे राहून प्रगतीची दिशा ठरवण्याचे उद्दिष्ट ठेवले आहे. या कार्यक्रमाला आलेल्या नागरिकांच्या मोठ्या सहभागामुळे स्वराज्य पक्षाची जनाधारावरील पकड अधिक दृढ होत असल्याचे स्पष्ट झाले आहे.
