Democracy Day on 12th August | विभागीय स्तरावरील लोकशाही दिनाचे 12 ऑगस्ट रोजी आयोजन – NNL

छत्रपती संभाजीनगर| विभागीय स्तरावरील लोकशाही दिनाचे ऑगस्ट महिन्याच्या दुसऱ्या सोमवारी 12 ऑगस्ट 2024 रोजी सकाळी 11 वाजता विभागीय आयुक्त कार्यालयात आयोजन करण्यात आले आहे. तसेच नियमित विभागीय लोकशाही दिन संपल्यानंतर विभागीय माहिला लोकशाही दिनाचे आयोजन करण्यात आले आहे.

तक्रार करण्यासाठीचे अर्ज विहित मुदतीत नमुना प्रप्रत्र-1 (क) मध्ये दोन प्रतीत आवश्यक त्या कागदपत्रासह विभागीय आयुक्त कार्यालयाचे आवक शाखा प्रमुख (नायब तहसीलदार) यांच्याकडे स्विकारण्यात येणार आहेत. विहित नमुना अर्ज प्रप्रत्र-1 (क) आवक शाखेत उपलब्ध करून देण्यात आला आहे. विभागीय महिला लोकशाही दिनासाठी पिडीत महिलांनी विहीत नमुन्यातील मुदत पुर्व अर्ज विभागीय उप आयुक्त, महिला व बाल विकास, खोकडपुरा औरंगाबाद तथा सदस्य सचिव यांच्याकडे सादर करावेत. अर्जाच्या दोन प्रती विभागीय लोकशाही दिनाच्या दिवशी विभागीय आयुक्त यांच्याकडे समक्ष पुन्हा सादर कराव्यात. तसेच ज्यांनी यापुर्वीच्या विभागीय स्तरावरील लोकशाही दिनी तक्रार अर्ज दिलेले असतील परंतू त्यांचे प्रकरणात अद्याप कार्यवाही झाली नाही, अशा प्रकरणात त्यांना पुन्हा अर्ज देता येणार नाही.

जिल्हास्तरावरील लोकशाही दिन कार्यक्रमात ज्या प्रश्नांची सोडवणूक होवू शकली नाही किंवा या प्रश्नाबाबत जिल्हास्तरीय लोकशाही दिनांत तक्रारदाराचे समाधान झाले नाही, असे सर्व प्रश्न विभागीय स्तरावरील लोकशाही दिनामध्ये घेण्यात येणार आहेत, असे विभागीय आयुक्त कार्यालयाने प्रसिध्दी पत्रकाद्वारे कळविले आहे.

विभागीय सहनिबंधक सहकारी संस्था कार्यालयाचे नवीन जागेत स्थलांतर
राज्य शासनाच्या सहकार, पणन व वस्त्रोद्योग विभागांतर्गत प्रादेशिक स्तरावर विभागीय सहनिबंधक, सहकारी संस्था, छत्रपती संभाजीनगर हे कार्यालय कार्यरत आहे. सहकार विभागाच्या शासन मालकीच्या नगर भूमापन क्र. १७३७०० मधील जागेवर शासन निर्णयान्वये सहकार संकुल’ उभारणीच्या प्रकल्पास प्रशासकीय व वित्तीय मान्यता प्राप्त झाली असून सदर इमारतीचे बांधकाम सुरू करण्यात येणार आहे.

त्यामुळे सध्या नगर भूमापन क्र. १७३७०० मधील अंजुमन बंगला, अदालत रोड, क्रांती चौक, छत्रपती संभाजीनगर या जागेवर स्थीत असलेले हे कार्यालय ०१ ऑगस्ट, २०२४ पासून जवळच क्रांती चौकातील भूविकास बँकेच्या इमारतीमध्ये स्थलांतरीत करण्यात येणार आहे. त्यामुळे ०१ ऑगस्ट, २०२४ पासून विभागीय सहनिबंधक, सहकारी संस्था, छत्रपती संभाजीनगर या कार्यालयाचा नवीन पत्ता जिल्हा सहकारी कृषि व ग्रामीण बहुउद्देशीय विकास बैंक इमारत (भूविकास बँक), दुसरा मजला, क्रांती चौक, छत्रपती संभाजीनगर ४३१००१. असा राहील.