Deglur News : देगलूरातील चिंतामणी सिटीमध्ये मोठी घरफोडी; ३ लाखांचा ऐवज लंपास
देगलूर, गंगाधर मठवाले| देगलूर शहरातील चिंतामणी सिटी परिसरात एका बंद घरात मोठी चोरी झाली असून चोरट्यांनी सुमारे तीन लाख रुपये किमतीचे सोन्याचे दागिने व रोख रक्कम लंपास केली. ही घटना दि. 28 जुलैच्या रात्रीपासून 29 जुलै सकाळी 9 वाजेच्या दरम्यान घडली असल्याची माहिती समोर आली आहे.
अनिकेत गजानन अमृते (वय 28, रा. चिंतामणी सिटी, देगलूर) हे खाजगी नोकरीनिमित्त उदगीर येथे वास्तव्यास असून, त्यांच्या वडिलांची सध्या गोवा येथे सीआयएसएफ मध्ये नेमणूक आहे. त्यामुळे घर काही काळापासून बंद होते.दि. 29 जुलै रोजी सकाळी 9.30 वाजता वडिलांचा फोन आल्यावर त्यांना समजले की, शेजारी राहणाऱ्या हणमंत पाटील यांनी घरातील चोरीबाबत माहिती दिली आहे. तत्काळ उदगीरहून देगलूरला येऊन पाहणी केली असता, घराचे दरवाजाचे कुलूप तोडलेले व घरातील कपाटे उघडलेली दिसून आली.तपासणीदरम्यान खालील दागिने व रोख रक्कम चोरीस गेल्याचे उघड झाले:
२ तोळ्यांचे सोन्याचे झुमके – २ जोड्या,३ ग्रॅमचे सोन्याचे फुल – ३ जोड्या,५ ग्रॅमची सोन्याची पोत,४ ग्रॅमचे ओम,२ ग्रॅमची सोन्याची अंगठी,१४ तोळ्यांची चांदीची चैन,रोख रक्कम – ₹३०,००० रुपये.चोरी गेलेल्या ऐवजाची एकूण किंमत ₹३,००,००० (तीन लाख रुपये) इतकी आहे. दरम्यान, देगलूर पोलिसांनी अज्ञात चोरट्याविरुद्ध गुन्हा दाखल करून तपास सुरू केला आहे. परिसरातील सीसीटीव्ही फुटेज तपासण्यात येत असून देगलूर पोलीस अधिक तपास करत आहेत.चोरीच्या या घटनेमुळे चिंतामणी सिटी परिसरात भीतीचे वातावरण निर्माण झाले आहे. स्थानिकांनी पोलिसांकडून रात्रगस्त वाढवण्याची मागणी केली आहे. हे वृत्त लिहून होईपर्यंत देगलूर पोलीस ठाण्यात गुन्हा नोंद करण्याची प्रक्रिया सुरू होती.
