लोहा| “छत्रपती शिवाजी महाराज की जय… एकच राजा इथे जन्मला शिवनेरी किल्ल्यावर…” या घोषणांनी लोहा शहर दुमदुमले. टाळ-मृदंग, लेझीमच्या तालावर आणि आतषबाजीच्या रोषणाईत शिवप्रेमींनी उत्साहात छत्रपती शिवाजी महाराजांची जयंती साजरी केली. शहर भगव्या ध्वजांनी आणि आकर्षक सजावटीने नटले होते.
दरवर्षीप्रमाणे यंदाही १९ फेब्रुवारी रोजी आमदार प्रतापराव पाटील चिखलीकर यांच्या पुढाकाराने भव्य-दिव्य शिवजन्मोत्सव सोहळ्याचे आयोजन करण्यात आले. मुख्य चौकातील छत्रपती शिवाजी महाराज यांच्या अश्वारूढ पुतळ्यास नेत्रदीपक रोषणाई व आकर्षक सजावट करण्यात आली होती. बुधवारी रात्रीपासूनच शिवप्रेमींनी अभिवादनासाठी मोठी गर्दी केली होती.
दुपारी आमदार प्रतापराव पाटील चिखलीकर, माजी आमदार सुभाष साबणे, युवा नेते प्रवीण पाटील चिखलीकर, नगराध्यक्ष शरद पवार, सचिन पाटील चिखलीकर, मुख्याधिकारी श्रीकांत लाळगे, उपनगराध्यक्ष करीम शेख, माजी उपनगराध्यक्ष केशवराव मुकदम, दत्ता वाले व इतर मान्यवरांच्या हस्ते शिवरायांच्या पुतळ्यास पुष्पहार अर्पण करून अभिवादन करण्यात आले.
जुन्या शहरातील छत्रपती शिवाजी महाराजांच्या पुतळ्यास आमदार चिखलीकर व मान्यवरांच्या हस्ते अभिषेक करण्यात आला. त्यानंतर मिरवणुकीतील शिवरायांच्या प्रतिमेस पुष्पहार अर्पण करून भव्य मिरवणुकीस प्रारंभ झाला.
मिरवणुकीत उपनगराध्यक्ष करीम शेख, माजी सभापती आनंदराव पाटील, नगरसेवक हरिभाऊ चव्हाण, जयंती मंडळाचे अध्यक्ष सुधाकर पाटील, पोलीस निरीक्षक नागनाथ आयलाने, मुख्याधिकारी श्रीकांत लाळगे, नगरसेवक गणेश बगाडे, सतीश निखाते, बी.डी. जाधव, केतन खिल्लारे, काळे गुरुजी, अभंग पाटील, भानुदास पाटील, हणमंत पवार, श्रीकांत पाटील यांसह शहर व परिसरातील विविध जाती-धर्मातील नागरिक मोठ्या संख्येने सहभागी झाले होते.
क्रीडा शिक्षक दिलीप कहाळेकर यांच्या लेझीम पथकाने लक्षवेधी सादरीकरण केले. टाळ-मृदंग पथके, सजवलेले अश्व, विविध ऐतिहासिक देखावे आणि आकर्षक वाहन सजावट (अनिल धुतमल) मिरवणुकीचे आकर्षण ठरले. शहरात भगव्या कमानी व झेंडे लावून उत्सवी वातावरण निर्माण करण्यात आले होते.
पोलीस निरीक्षक आयलाने व त्यांच्या पथकाने चोख बंदोबस्त ठेवला होता. ठिकठिकाणी शिवप्रेमींनी पिण्याच्या पाण्याची व फराळाची व्यवस्था केली होती. जयंती मंडळाचे अध्यक्ष सुधाकर पाटील व सहकाऱ्यांनी उत्सव यशस्वी करण्यासाठी विशेष मेहनत घेतली. एकूणच, शिवभक्तांच्या उत्साहात आणि जल्लोषात लोहा शहरात शिवजयंतीचा सोहळा भक्तिभावाने व दिमाखात साजरा झाला.
