नांदेड| “आम्हाला दिखाऊ कारभार नको, मुंढेंसारखा कडक आणि प्रामाणिक अधिकारी हवा!”—अशा घोषणांनी बुधवारी नांदेडचे वातावरण दणाणून गेले. दिव्यांग कल्याण विभागाचे सचिव तुकाराम मुंढे यांच्या अचानक झालेल्या बदलीच्या निषेधार्थ सकल दिव्यांग संघटनांनी थेट रस्त्यावर उतरून आक्रमक भूमिका घेतली.
जिल्हाधिकारी कार्यालयावर काढण्यात आलेल्या मोर्चात शेकडो दिव्यांग बांधव सहभागी झाले होते. कडक उन्हातही हातात मागण्यांचे फलक, तोंडात घोषणांचा आवाज आणि मनात तीव्र संताप—अशा वातावरणात आंदोलन पार पडले.
विशेष म्हणजे, नांदेड दौऱ्यावर असलेल्या विधिमंडळ अंदाज समितीलाही आंदोलकांनी घेराव घालत जाब विचारला. “कर्तव्यदक्ष अधिकाऱ्याला हटवून कोणाचा फायदा केला?” असा थेट सवाल करत आंदोलकांनी आपला रोष व्यक्त केला.
आंदोलनकर्त्यांच्या वतीने अंदाज समितीचे अध्यक्ष अर्जुन खोतकर यांना निवेदन देण्यात आले. यामध्ये मुंढे यांची बदली त्वरित रद्द करावी, संजय गांधी निराधार योजनेतील थकीत मानधन जमा करावे, तसेच दिव्यांगांसाठी राखीव निधीचा योग्य वापर करावा, अशा मागण्या करण्यात आल्या.
दिव्यांग बांधवांच्या मते, मुंढे यांनी आपल्या कार्यकाळात बोगस लाभार्थ्यांवर कारवाई करत योजनांमध्ये पारदर्शकता आणली होती. त्यामुळेच त्यांची बदली ही अन्यायकारक असल्याची भावना आंदोलकांनी व्यक्त केली.
या आंदोलनाचे नेतृत्व राहुल साळवे यांनी केले. दरम्यान, अर्जुन खोतकर यांनी आंदोलकांच्या मागण्यांवर सकारात्मक विचार करून शासनाकडे पाठपुरावा करण्याचे आश्वासन दिले. नांदेडमधील या आंदोलनामुळे राज्याच्या प्रशासकीय वर्तुळात पुन्हा एकदा “कर्तव्यदक्ष अधिकाऱ्यांच्या बदलीचा मुद्दा” चर्चेत आला आहे.