नांदेड/माहूर (प्रतिनिधी) नांदेड जिल्ह्यातील पवित्र माहूरगडावरील श्री दत्त शिखर संस्थानच्या महंतपदी योगी शाम भारती यांची ३१ वे महंत म्हणून निवड करण्यात आली आहे.
धार्मिक परंपरेनुसार झालेल्या या निवडीमुळे दत्तसंप्रदायातील भक्तांमध्ये समाधान आणि उत्साहाचे वातावरण निर्माण झाले आहे. श्री दत्त शिखर संस्थान माहुर गडाचे ३१ वे महंत म्हणुन श्री श्री डॉ धनेश्वर भारती उर्फ श्याम महाराज गुरू आनंद भारती यांची तिन्ही वेळी निघालेल्या ईश्वर चिठ्ठी द्वारे निवड झालेली आहे.
संस्थानाच्या गादीवर नव्याने विराजमान होताना योगी शाम भारती यांनी अध्यात्म, सेवा आणि परंपरेचा वारसा पुढे नेण्याचा संकल्प व्यक्त केला. दत्त शिखर संस्थान हे श्रद्धा आणि भक्तीचे केंद्र मानले जाते. येथे दरवर्षी हजारो भाविक दर्शनासाठी येत असतात. अशा या पवित्र गादीची जबाबदारी स्वीकारणे ही मोठी आध्यात्मिक परंपरा असल्याचे मानले जाते.
योगी शाम भारती हे साधेपणा, भक्तीभाव आणि आध्यात्मिक चिंतनासाठी ओळखले जातात. त्यांच्या मार्गदर्शनाखाली संस्थानातील धार्मिक परंपरा अधिक बळकट होतील, तसेच भक्तांना आध्यात्मिक दिशा मिळेल, अशी अपेक्षा व्यक्त होत आहे.
दरम्यान, त्यांच्या निवडीबद्दल विविध संत-महंत, मान्यवर तसेच भाविकांकडून अभिनंदनाचा वर्षाव होत असून माहूरगड परिसरात आनंदाचे वातावरण निर्माण झाले आहे.