हिमायतनगर| हदगाव, हिमायतनगर विधान सभा मतदार संघात सत्ता परिवर्तनाचे वारे वाहत आहेत. आजी माजी आमदाराच्या कार्यप्रणालीवर नाखूष जनता नव्या चेहऱ्याची वाट पाहत असून, वंचित आघाडीकडून अनेकजण अगदी गुडघ्याला बाशिंग बांधून तयारी करीत असले, तरी वंचित आघाडीचे सर्वेसर्वा अँड. प्रकाश आंबेडकर यांची भुमिका निर्णायक ठरत असते. परवाच अँड. प्रकाश आंबेडकर हे नांदेड दौर्यावर असताना त्यांनी डाॅ. श्यामराव वाकोडे यांच्या निवासस्थानी भेट देऊन अनेक विषयांवर चर्चा केली. त्यामुळे हदगाव, हिमायतनगर विधानसभा मतदारसंघात वंचित आघाडी नवा पर्याय देण्याच्या मार्गावर असल्याचे बोलले जात आहे.
आता विधानसभा निवडणूकीच्या पार्श्वभूमीवर अँड. आंबेडकर यांची डाॅ. वाकोडे यांच्या निवासस्थानी घेतलेली भेट आगामी विधान सभेची उमेदवारी त्यांना बहाल करण्यासाठीच होती अशी चर्चा रंगत असतानाच फक्त घोषणेची औपचारिकताच बाकी असल्याचे, त्यांच्या निकटवर्तीयातून सांगीतले जात आहे. डॉ वाकोडे याना वंचितने उमेदवारी दिली तर काँग्रेसला मोठा धक्का बसून २०१४ च्या विधानसभेची पुनरावृत्ती होण्याची शक्यता नाकारता येत नाही. कारण आदिवासी समज बांधवाचे एकगठ्ठा मतदान हे निर्णायक मतदान असून, २०१४ च्या निवडणुकीत निवडणूक लढविले डॉ.भुरके यांना आदिवासी समाजाने दिलेल्या मतदानामुळे काँग्रेसच्या उमेदवाराला घरचा रस्ता दाखविला होता हे सर्वाना माहित आहे.
हदगाव, हिमायतनगर विधान सभा मतदारसंघात मागील अनेक निवडणूक बघता शिवसेना, काँग्रेस असेच सत्ता समीकरणे राहत आली आहेत. परंतू वंचित आघाडीच्या उमेदवाराला मिळालेली मते निर्णायक ठरत आली आहेत हे ही इथे विशेष…. सन २०१४ च्या विधानसभा निवडणूकीत काँग्रेसचे विद्यमान आमदार माधवराव पाटील जवळगावकर यांना वंचितच्या उमेदवारामुळेच पराभवाची चव चाखायला मिळाली. त्यावेळी शिवसेनेकडून नागेश पाटील आष्टीकर यांचा उदय झाला होता. तब्बल २६ हजार मते ही वंचितचे उमेदवार डाॅ. बळीराम भुरके यांना मिळाली होती. २०१९ लाही वंचितने आपली आघाडी कायम ठेवली होती. आता २०२४ च्या विधानसभा निवडणुकीत वंचित बहुजन आघाडी तगड्या उमेदवाराच्या शोधात होती. आता डाॅ. वाकोडे यांच्या रूपाने वंचितला उमेदवार मिळाला असल्याचे बोलल्या जात असून, वंचित आघाडी ओबीसी फॅक्टर घेवून चालली तर वंचित लाही सुगीचे दिवस पहावयास मिळतील. अशी चर्चा आता जोरकसपणे रंगू लागली आहे.
सध्या सर्वत्र मराठा ओबीसी आरक्षणाचा मुद्दा पेटून उठलेले आहे. त्यामुळे मतांची मोठ्या प्रमाणात विभागनी होणार आहे. याचं मुद्द्याला धरून वंचित बहुजन आघाडी ठीक ठिकाणी आरक्षण बचाव मोहीम राबवून ओबीसी समाजाला सोबत घेऊन निवडणुक जिंकण्यासाठी प्रयत्नशील आहे. त्यामुळे साम, दाम, दंड, भेद या तत्वात बसणारे तगडे उमेदवार देण्यासाठी वंचित प्रयत्न करत आहे. त्यामूळेच कि काय..? अँड. प्रकाश आंबेडकर यांनी नांदेड दौर्यावर आल्यानंतर खासकरून हदगाव – हिमायतनगर विधानसभा निवडणूक लढविण्यासाठी इच्छुक असलेले डाॅ. श्यामराव वाकोडे यांच्या निवासस्थानी भेट देऊन अनेक विषयांवर चर्चा केली. यामुळे राजकीय चर्चाना उधाण आले असून, डाॅ. श्यामराव वाकोडे उमेदवारी दिल्या गेली तर घराणेशाहीच्या जोरावर आमदार होण्याचे स्वप्न पाहणाऱ्यांचे स्वप्न भंगण्याची शक्यता नाकारता येत नाही.
