हिमायतनगर, अनिल मादसवार| हिमायतनगर नगरपंचायत निवडणुकीदरम्यान विविध पक्षांच्या उमेदवारांनी मतदारांना प्रलोभने दाखवून आकर्षित करण्याचा प्रयत्न केला. मात्र, हिमायतनगरच्या मायबाप जनतेने विरोधकांच्या खोट्या आश्वासनांना बळी न पडता आमच्यावर विश्वास दाखविला, अशी प्रतिक्रिया शिवसेना शिंदे गटाचे प्रभाग क्रमांक १७ चे नवनिर्वाचित नगरसेवक सुभाष बलपेलवाड (People voted for Subhash Balpelwad) यांनी दिली.
आमदार बाबुराव कदम कोहळीकर यांच्या प्रभावी नेतृत्वाखाली व मार्गदर्शनाखाली जनतेने आम्हाला भरभरून पाठिंबा दिला आणि विजयी केले. नवनिर्वाचित नगरसेवक सुभाष बलपेलवाड यांनी स्पष्ट शब्दांत सांगितले की, “पैशाच्या व आमिषांच्या जोरावर मत विकत घेण्याचे राजकारण हिमायतनगरने नाकारले आहे. मायबाप जनतेने दाखवलेला विश्वास हा आमच्यासाठी जबाबदारी असून, त्याची उतराई विकास कामांतूनच करू.”
या विजयामागे आमदार बाबुराव कदम कोहळीकर यांच्या खंबीर नेतृत्वाची निर्णायक भूमिका असल्याचे त्यांनी नमूद केले. “आ. कोहळीकर यांच्या मार्गदर्शनामुळेच आम्हाला जनतेची साथ मिळाली,” असेही ते म्हणाले.
आता प्रभाग क्रमांक १७ मध्ये सर्वांगीण विकास, मूलभूत सुविधांचा विस्तार, नागरिकांच्या प्रश्नांवर थेट कृती आणि भ्रष्टाचारमुक्त कारभार हा आमचा स्पष्ट अजेंडा असेल, असा इशाराही बलपेलवाड यांनी दिला. या निकालामुळे हिमायतनगरच्या राजकारणात प्रलोभनांचे समीकरण कोलमडले असून, वॉर्ड क्रमांक १७ मधील जनतेने विकासाभिमुख आणि नेतृत्वावर विश्वास ठेवणाऱ्या राजकारणाला विजयी ठरवले आहे.
