Sant Gadge Baba memorial : हिमायतनगरात संत गाडगे बाबा स्मारकाच्या जागेवरील अतिक्रमणप्रकरणी पंचनामा
हिमायतनगर | हिमायतनगर शहरातील श्री संत गाडगे बाबा यांच्या नियोजित स्मारकासाठी आरक्षित असलेल्या जागेवर अतिक्रमण झाल्याचा गंभीर प्रकार उघडकीस आल्यानंतर नगरपंचायत प्रशासनाने अखेर दखल घेतली आहे. संत गाडगे बाबा स्मारक समितीने दिलेल्या लेखी निवेदनानंतर नगरपंचायतीचे अधिकारी व कर्मचारी यांनी प्रत्यक्ष घटनास्थळी जाऊन अतिक्रमणाचा पंचनामा केला आहे.
शहरातील वार्ड क्रमांक १३ मधील म्युनिसिपल मालमत्ता क्रमांक १३–२१ ही जागा गाडगे महाराजांच्या स्मारकासाठी नगरपंचायतकडे आरक्षित असून, सदर जागेवर अनधिकृत अतिक्रमण झाल्याने स्मारक उभारणीला अडथळा निर्माण झाला होता. याबाबत स्मारक समितीने प्रशासनाकडे तातडीने अतिक्रमण हटविण्याची मागणी केली होती.
स्मारक समितीच्या निवेदनात, स्मारकासाठी पूर्वीच निश्चित करण्यात आलेल्या जागेवर अतिक्रमण वाढत असल्याकडे लक्ष वेधण्यात आले होते. याकडे वेळेवर दखल न घेतल्याने नागरिकांमध्ये नाराजी व्यक्त होत होती. प्रशासनाने त्वरित पावले उचलत आज घटनास्थळी जाऊन पंचनामा केला.
नगरपंचायत प्रशासनाने तातडीने अतिक्रमण हटवले नाही, तर संत गाडगे बाबा स्मारक समिती, समस्त समाजबांधव व नांदेड जिल्ह्यातील भाविक लोकशाही मार्गाने आंदोलन छेडतील, असा इशारा यापूर्वीच देण्यात आला होता. या निवेदनाच्या प्रती जिल्हाधिकारी नांदेड, आमदार, तहसीलदार व पोलीस निरीक्षक हिमायतनगर यांनाही पाठविण्यात आल्या आहेत.
पंचनाम्यानंतर निर्णयाकडे लक्ष
दरम्यान, आज करण्यात आलेल्या पंचनाम्यानंतर संबंधित अतिक्रमण हटवले जाणार की जागा पूर्वस्थितीत ठेवली जाणार, याबाबत नगरपंचायत प्रशासन काय निर्णय घेते, याकडे शहरवासीयांसह समाजबांधवांचे लक्ष लागले आहे. प्रशासनाच्या पुढील निर्णयावर संत गाडगे बाबा स्मारक उभारणीचे भवितव्य अवलंबून असल्याने या प्रकरणाला महत्त्व प्राप्त झाले आहे. या पंचनाम्याच्या वेळी नगरपंचायत अभियंता काटकर, विठ्ठल शिंदे, तक्रार करते राम नरवाडे, बालाजी बिल्लेवाड, पाशा खतिब, शुद्धोधन हनवते, गणेश रचेवार आदींसह अनेकांची उपस्थिती होती.
