Talathi B. T. Shelke – निराधार महिलांचा छळ करणाऱ्या तलाठी बी.टी.शेळकेची हकालपट्टी करा व पीडित दलितांना घरकुल मंजूर करा! – NNL
नांदेड | संजय गांधी निराधार योजनेच्या शहरी विभागात वशिलेबाजीने वर्षानुवर्षे एकाच ठिकाणी ठाण मांडून बसलेले तलाठी बी.टी.शेळके यांची हकालपट्टी करा आणि मौजे सोमेश्वर ता.जि.नांदेड येथील दलित पीडितांना घरकुल मंजूर करा ह्या मागणीसाठी सीटू संलग्न नांदेड जिल्हा मजदूर युनियनचे सह सचिव कॉ.जयराज गायकवाड हे मागील तीन दिवसापासून जिल्हाधिकारी कार्यालया समोर आमरण उपोषणास बसले आहेत.
प्रशासनात जबरदस्त छाप निर्माण करून वशिलेबाजीने अनेक वर्षांपासून संगायो मध्ये तलाठी या पदावर कार्यरत असलेले बी.टी.शेळके हे आर्थिक माया मिळविल्याशिवाय निराधारांना पात्र ठरवीत नाहीत. किंबहुना कुणाच्याही घरी प्रत्यक्षात जात नाहीत आणि पात्र मान्यता देतात. त्यांच्या विरोधात माकप सचिव कॉ. गंगाधर गायकवाड यांनी दि.१४ मे आणि ११ जून २०२४ रोजी दोन वेगवेगळ्या लेखी तक्रारी देऊन त्यांची बदली माहूर किंवा किनवट येथे करण्याची मागणी केली होती.
परंतु वरिष्ठानी दखल घेतली नसल्याने कॉ. जयराज गायकवाड यांनी थेट आमरण उपोषणास सुरवात केली आहे. तलाठी शेळके यांनी अमाप माया जमविली असून त्यांची खातेनिहाय चौकशी केल्यास मोठे घबाड सापडण्याची शक्यता आहे. तलाठी शेळके यांची तातडीने हकालपट्टी करावी तसेच मौजे सोमेश्वर ता.जि.नांदेड येथील नेमूबाई भगवान सरोदे व रामदास प्रसराम सरोदे यांना ग्रामपंचायतने पारित केलेल्या ठरावाप्रमाणे घरकुल मंजूर करावे.या दोन मागण्यासाठी मजदूर युनियनचे उपोषण सुरु आहे. वरिष्ठानी दखल घेतली नाही तर तीव्र आंदोलन करणार असल्याचे सह सचिव कॉ.जयराज गायकवाड यांनी प्रसिद्धी पत्रकाद्वारे कळविले आहे.
