नांदेड| महापालिका निवडणुकीच्या पार्श्वभूमीवर लागू असलेल्या आचारसंहिता कालावधीत नांदेड वाघाळा शहर महापालिकेच्या आचारसंहिता पथकांनी राज्य उत्पादन शुल्क विभागाच्या सहकार्याने अवैध देशी-विदेशी मद्यविक्री व अमली पदार्थांविरोधात धडक कारवाई केली. या कारवाईत तब्बल ४४१.२४ लिटर मद्य तसेच २.२ किलो गांजा जप्त करण्यात आला आहे.
राज्य उत्पादन शुल्क विभाग, नांदेड यांनी दि. १५ डिसेंबर २०२५ ते ११ जानेवारी २०२६ या कालावधीत नांदेड शहर व जिल्ह्यात अवैध मद्यविक्री व वाहतुकीविरोधात केलेल्या कारवाईत एकूण ५ गुन्हे नोंदविण्यात आले आहेत.
याशिवाय पोलीस विभागामार्फत अवैध शस्त्रास्त्रांविरोधात केलेल्या कारवाईत १ पिस्टल, १ राऊंड, ४ खंजर व ७ तलवारी जप्त करण्यात आल्या आहेत. प्रतिबंधात्मक कारवाईअंतर्गत विविध कलमांखाली ९२९ व्यक्तींवर हद्दपारी व तत्सम कारवाई करण्यात आली आहे.
नांदेड वाघाळा शहर महापालिका निवडणूक विभागाने ७ भरारी पथके, १५ स्थिर सर्व्हेक्षण पथके, ७ व्हिडीओ सर्व्हिलियन्स पथके तसेच २ आचारसंहिता दक्षता पथके कार्यरत ठेवली आहेत. या पथकांमार्फत संपूर्ण शहरात सतत नजर ठेवण्यात येत असून नाकाबंदी करून वाहनांची तपासणीही केली जात आहे. राज्य निवडणूक आयोगाच्या आदेशानुसार फिरती भरारी पथके २४ तास कार्यरत आहेत.
महानगरपालिका निवडणुकीत उमेदवारांची संख्या मोठी असून, निवडणूक काळात आचारसंहितेचा भंग करणाऱ्यांवर कठोर कारवाई करण्यात येईल, असा इशारा पालिका आयुक्त तथा निवडणूक अधिकारी डॉ. महेशकुमार डोईफोडे यांनी दिला आहे.
