हिमायतनगर, अनिल मादसवार| सार्वत्रिक निवडणूक 2025 च्या पार्श्वभूमीवर हिमायतनगर नगरपरिषदेसाठी घेतलेल्या नामनिर्देशन छाननीनंतर निवडणुकीचे संपूर्ण चित्र मोठ्या प्रमाणात स्पष्ट झाले आहे. नगराध्यक्ष आणि नगरसेवक पदांसाठी अर्जांची छाननी पूर्ण होताच, स्पर्धा किती अटीतटीची होणार याची दिशा आता ठरू लागली आहे.
नगराध्यक्षपदासाठी १२ उमेदवार पात्र – ९ अपात्र – नगराध्यक्ष पदासाठी दाखल झालेल्या 21 अर्जांपैकी 12 अर्ज पात्र, तर 9 अर्ज अपात्र ठरले आहेत. छाननीतून पात्र ठरलेल्या उमेदवारांमध्ये सर्व प्रमुख पक्षांचे दावेदार असल्याने पुढील टप्प्यातील मागे घेणे आणि पक्षांतर्गत चर्चांवर सर्वांचे लक्ष केंद्रीत झाले आहे.
नगरसेवकपदासाठी 102 उमेदवार रिंगणात – 87 अर्ज बाद – हिमायतनगरच्या एकूण 17 प्रभागांमधून 189 अर्ज दाखल झाले होते. यापैकी छाननीनंतर 102 अर्ज पात्र, तर 87 अर्ज अपात्र ठरले आहेत. त्यामुळे प्रभागनिहाय चुरस वाढण्याची स्पष्ट चिन्हे दिसत असून अनेक ठिकाणी त्रिकोणी, तर काही ठिकाणी चौकोनी लढतीची शक्यता वर्तवली जात आहे.
आता नजर अर्ज मागे घेण्याच्या टप्प्यावर – छाननीनंतर आता सर्वांत महत्त्वाचा टप्पा म्हणजे अर्ज मागे घेणे. किती उमेदवार माघार घेतात आणि किती जण अंतिम रिंगणात उभे राहतात यावर संपूर्ण निवडणुकीची दिशा अवलंबून असेल. बहुतेक पक्षांतर्फे आंतरपक्षीय समन्वय, गट-तटबंदी, दबाव-राजकारण आणि फॉर्म्युला निश्चितीमुळे अनेक ठिकाणी माघारीची मालिका दिसू शकते.
मोठ्या पक्षांची प्रतिष्ठा पणाला – अंतिम यादीकडे सर्वांचे लक्ष – काँग्रेस, भाजपा, राष्ट्रवादी अजित पवार, राष्ट्रवादी शरद पवार, शिवसेना (शिंदे), शिवसेना (उबाठा) या सर्व प्रमुख पक्षांसाठी ही निवडणूक प्रतिष्ठेची ठरत आहे. अंतिम रिंगणात कोण-कोण राहतात यावर स्थानिक राजकारणाचा पुढील चेहरामोहरा निश्चित होणार आहे.
हिमायतनगरमध्ये रंगणार अटीतटीची लढत – पात्र ठरलेल्या उमेदवारांच्या संख्येवरूनच स्पष्ट होते की, हिमायतनगर नगरपरिषद निवडणूक अत्यंत चुरशीची होणार आहे. नगराध्यक्षपदावर कोणाचा झेंडा फडकेल आणि 17 प्रभागांत कोणते नवीन चेहरे उदयास येतील, याकडे शहरवासियांचे कुतूहल वाढले आहे.
