हिमायतनगर, अनिल मादसवार| मराठा आरक्षणाचा प्रश्न वर्षानुवर्षे प्रलंबित असताना शासनाकडून ठोस निर्णयासाठी होत असलेल्या कथित दिरंगाईचा संतापजनक परिणाम पुन्हा एकदा हिमायतनगर तालुक्यात पाहायला मिळाला. कामारी येथील सुभाष केशवराव शिरफुले (वय ४२) यांनी सोमवारी (दि. २१ सप्टेंबर) सायंकाळी शेतात आत्महत्या केल्याची घटना मंगळवारी सकाळी उघडकीस आली. या घटनेने कामारीसह संपूर्ण परिसरात हळहळ आणि संतापाची लाट उसळली.
मराठा आरक्षणाच्या मागणीच्या पार्श्वभूमीवर शिरफुले यांनी हे टोकाचे पाऊल उचलल्याचा दावा ग्रामस्थ व आंदोलनकर्त्यांनी केला आहे. घटनेनंतर “आरक्षणाच्या प्रश्नावर आणखी किती बळी जाण्याची शासन वाट पाहणार?” असा संतप्त सवाल उपस्थित करण्यात आला.
कामारी गावात यापूर्वीही मराठा आरक्षणाच्या आंदोलनादरम्यान सुदर्शन देवराये यांनी आत्महत्या केली होती. त्यामुळे शिरफुले यांचा मृत्यू हा कामारीतील दुसरा बळी असल्याचा दावा मराठा समाजबांधवांनी केला. 2023 मधील सुदर्शन देवराये यांच्या आत्महत्येची घटना त्यावेळीही मराठा आरक्षण आंदोलनाशी जोडून वृत्तांकित झाली होती.
शिरफुले यांच्या मृत्यूची माहिती समोर आल्यानंतर कामारीतील मराठा समाजबांधव आणि ग्रामस्थांनी तहसील कार्यालय तसेच पोलिस ठाण्यात ठिय्या आंदोलन केले. कुटुंबीयांना तातडीने शासनाची मदत मिळावी आणि त्यांच्या मागण्यांवर निर्णय घ्यावा, अशी मागणी करण्यात आली.
यावेळी प्रशासनाला देण्यात आलेल्या निवेदनात शिरफुले कुटुंबीयांना ५० लाख रुपयांची आर्थिक मदत, कुटुंबातील एका सदस्याला शासकीय नोकरी, त्यांच्या पाल्यांच्या उच्च शिक्षणाची संपूर्ण जबाबदारी शासनाने स्वीकारावी, तसेच कुटुंबाला तातडीने घरकुलाचा लाभ द्यावा, अशा मागण्या करण्यात आल्या.
मराठा आरक्षणाच्या प्रश्नावर आंदोलन, उपोषणे आणि आत्महत्यांच्या घटना सुरू असताना शासनाने केवळ आश्वासनांवर न थांबता ठोस निर्णय घ्यावा, अशी मागणी आंदोलनकर्त्यांनी केली. एकीकडे आरक्षणाचा प्रश्न कायम प्रलंबित आणि दुसरीकडे सामान्य कुटुंबातील कर्ता पुरुष जीव गमावत असेल, तर शासनाची जबाबदारी नेमकी कुठे संपते? असा थेट सवालही यावेळी उपस्थित करण्यात आला.
याबाबतचे निवेदन तहसीलदार पल्लवी टेमकर तसेच पोलिस निरीक्षक लक्ष्मण केंद्रे यांना देण्यात आले. शिरफुले कुटुंबीयांना तातडीने मदत देऊन त्यांच्या मागण्यांचा सहानुभूतीपूर्वक विचार करावा, अशी मागणी करण्यात आली. सुभाष शिरफुले यांच्या पश्चात पत्नी, दोन मुली, एक मुलगा, आई-वडील आणि भाऊ असा परिवार आहे. कुटुंबातील कर्त्या व्यक्तीच्या अचानक जाण्याने कुटुंबावर मोठे संकट कोसळले आहे.
मंगळवारी दुपारी कामारी येथे शोकाकुल वातावरणात त्यांच्या पार्थिवावर अंत्यसंस्कार करण्यात आले. यावेळी कामारीसह हिमायतनगर शहरातील मराठा समाजबांधव आणि ग्रामस्थ मोठ्या संख्येने उपस्थित होते. आरक्षणाच्या प्रश्नावर आत्महत्येसारखे टोकाचे पाऊल उचलण्याची वेळ कोणावरही येऊ नये, यासाठी शासनाने संवेदनशीलतेने आणि तातडीने पुढाकार घेण्याची गरज आहे.
