हदगाव, शेख चांदपाशा| हदगाव तालुक्यात अवैध गौण खनिज वाळू उत्खनन व बेकायदेशीर वाहतूक करणाऱ्यांविरोधात तहसील प्रशासनाने ‘शून्य सहनशीलता’ धोरण राबवत थेट आणि धडक कारवाई सुरू केली असून, वाळू माफियांचे धाबे दणाणले आहेत.
तहसील कार्यालयाच्या आदेशान्वये स्थापन करण्यात आलेल्या विशेष पथकाने दि. 05 फेब्रुवारी 2025 रोजी मौजे येखंबा शिवारात सायंकाळी 5.45 वाजता विनानंबर ट्रॅक्टरद्वारे सुरू असलेली बेकायदेशीर रेती वाहतूक रंगेहात पकडली. संबंधित ट्रॅक्टर तात्काळ जप्त करून तहसील कार्यालयात आणण्यात आला.
यावरच न थांबता दि. 09 फेब्रुवारी 2026 रोजी तहसीलदारांनी स्वतः मैदानात उतरून कारवाईची सूत्रे हाती घेतली. मौजे पळसा येथील बसस्थानकाजवळ रस्त्यावर अवैध रेती वाहतूक करणारा ट्रॅक्टर (क्रमांक MH26 BX 3967) एक ब्रास रेतीसह पकडण्यात आला. तहसीलदारांच्या या थेट व धाडसी कारवाईमुळे संपूर्ण तालुक्यातील वाळू माफियांमध्ये मोठी खळबळ उडाली आहे.
दोन्ही वाहने जप्त करण्यात आली असून संबंधित आरोपींविरोधात नियमानुसार कडक दंडात्मक व कायदेशीर कारवाई सुरू आहे. तालुक्यात अवैध वाळू उत्खनन व वाहतुकीवर प्रशासनाचा करडा डोळा कायम राहणार असल्याचा स्पष्ट इशाराही देण्यात आला आहे. “अवैध वाळू वाहतूक करणाऱ्यांना कोणतीही सवलत दिली जाणार नाही,” असा ठाम संदेश तहसील प्रशासनाने दिला आहे.
