कंधार/नांदेड। माहे/जुलै 2024 महिन्याचे पगार बिल काढण्या करीता प्रभारी मुख्याध्यापक संभाजी कांगणे, प्राथमिक आश्रम शाळा, गांधीनगर, ता. कंधार जि.नांदेड यांनी 5000/- रुपयेची मागणी केली, यावरून लाचलुचपत प्रतिबंधक विभागाने त्यांना रंगेहाथ पकडून कार्यवाही केली आहे. यावरून आश्रम शाळेत देखील लाचखोरी होत असल्याचे समोर आले आहे.
थोडक्यात हकिकत अशी की, तक्रारदार हे प्राथमिक आश्रम शाळा,गांधीनगर, ता. कंधार,जि.नांदेड येथे वसतीगृह अधीक्षक असून, त्यांचे माहे/जुलै 2024 महिन्याचे पगार बिल काढण्या करीता आरोपी प्रभारी मुख्याध्यापक संभाजी कांगणे, प्राथमिक आश्रम शाळा, गांधीनगर, ता. कंधार जि.नांदेड यांनी 5000/- रुपयेची मागणी केली. सदर 5000/- रुपयाची रक्कम लाच असल्याची तक्रारदार यांना खात्री झाल्याने व त्यांना सदरची लाच रक्कम देण्याची इच्छा नसल्याने, तक्रारदार यांनी लाचलुचपत प्रतिबंधक विभाग, नांदेड येथे दि. 24/07/2024 रोजी तक्रार दिली.
सदर तक्रारीवरून लाचलुचपत प्रतिबंधक विभाग, नांदेड युनिट कडून दिनांक 01/08/2024 रोजी लाच मागणीची पडताळणी केली असता, लाच मागणी पडताळणी दरम्यान यातील आरोपी प्रभारी मुख्याध्यापक संभाजी कांगणे यांनी तक्रारदार यांच्याकडे शासकीय पंचासमक्ष माहे/जुलै 2024 या महिन्याचे पगार बिल काढण्या साठी 5,000/- रूपये लाचेची मागणी केली आहे. यावेळी लाचलुचपत प्रतिबंधक विभागाने त्यांना ताब्यात घेऊन या प्रकरणात पोलीस स्टेशन कंधार, ता. कंधार, जि.नांदेड येथे गुन्हा दाखल केला आहे.
ही कार्यवाही डॉ.राजकुमार शिंदे, पोलीस अधीक्षक, अँटी करप्शन ब्युरो, नांदेड परिक्षेत्र मो.क्र. 9623999944, पर्यवेक्षण अधिकारी श्री प्रशांत पवार, पोलीस उप अधीक्षक, अँटी करप्शन ब्युरो, नांदेड, मो.क्र. 9870145915 यांच्या मार्गदर्शनाखाली सापळा व तपास अधिकारी श्रीमती स्वप्नाली धुतराज पोलीस निरिक्षक, अँटी करप्शन ब्युरो, नांदेड यांनी सापळा कारवाई पथक अँटी करप्शन ब्युरो, नांदेड टीम पाठवून केली आहे.
या कार्यवाही नंतर नांदेड जिल्ह्यातील सर्व नागरिकांना लाचलुचपत प्रतिबंधक विभागाने आवाहन केले की, त्यांच्याकडे कोणत्याही लोकसेवकाने, शासकीय अधिकारी/कर्मचारी यांनी किंवा त्यांच्या वतीने खाजगी इसम (एजंट) यांनी कोणतेही शासकीय काम करून देण्यासाठी कायदेशीर फी व्यतिरिक्त अन्य लाचेची मागणी करीत असल्यास तात्काळ दुरध्वनी क्रमांक 02462-253512, टोल फ्रि क्रं. 1064 वर संपर्क साधावा.
