हिमायतनगर, अनिल मादसवार| महाशिवरात्रीच्या पावन पर्वानिमित्त हिमायतनगर येथील श्री परमेश्वर मंदिरात (Shri Parameshwar Mandir) येथे मागील आठ दिवसांपासून सुरू असलेल्या अखंड हरिनाम सप्ताह व ग्रंथराज ज्ञानेश्वरी पारायण सोहळ्याची दि. २० फेब्रुवारी रोजी ग्रामदिंडी व हभप नारायण महाराज गरड ( Narayan Maharaj Garad) यांच्या मधुर काल्याच्या कीर्तनाने भक्तिमय सांगता करण्यात आली. ग्रामीण व शहरी भागातून हजारो भक्तांचा जनसागर मंदिर परिसरात लोटला होता.
पालखी दिंडीने शहर दुमदुमले
सकाळी ९ वाजता व्यासपीठाचार्य हभप शिवाजी महाराज वडगावकर यांच्या नेतृत्वाखाली ज्ञानेश्वरी पारायणाची पालखी दिंडी शहरातील मुख्य मार्गावरून काढण्यात आली. चिमुकल्या मुलींनी डोक्यावर ज्ञानेश्वरी ग्रंथ व हाती भगवा ध्वज घेत सहभाग नोंदविला. टाळ-मृदंगाच्या गजरात श्री परमेश्वर भजनी मंडळाच्या वारकरी महिला-पुरुषांनी ताल धरत शहरवासीयांचे लक्ष वेधले.
दिंडी परत मंदिरात आल्यानंतर सत्कार समारंभ व महाप्रसादाने पारायणाची सांगता करण्यात आली. शिवभक्त बंटी गुड्डेटवार यांनी ११ किलो खवा प्रसादाचे वितरण केले.
काल्याच्या कीर्तनात श्रीकृष्ण लीलेचे रसाळ विवेचन
दुपारी १.३० वाजता सुरू झालेल्या काल्याच्या कीर्तनात जवळपास तीन तास नारायण महाराज गरड यांनी श्रीकृष्ण लीलेचे सखोल मार्गदर्शन करत उपस्थितांना भक्तीचा मार्ग दाखविला. दरम्यान आमदार बाबुराव कदम कोहळीकर (Baburao Kadam Kohlikar) माजी आमदार माधवराव पाटील जवळगावकर (Madhavrao Patil Javalgaonkar) तसेच तहसीलदार सौ. पल्लवी टेमकर (Pallavi Temkar) यांनी भेट देत श्री परमेश्वराचे दर्शन घेत कीर्तनाचा लाभ घेतला.
सायंकाळी ५ वाजता राधा-कृष्णाची झांकी साकारलेल्या बालकांच्या हस्ते दहीहंडी फोडण्यात आली. त्यानंतर काल्याच्या प्रसाद वितरणासह राधाकृष्णांची मिरवणूक शहरातून काढण्यात आली. या कार्यक्रमास मंदिराचे उपाध्यक्ष महावीरसेठ श्रीश्रीमाळ, सेक्रेटरी अनंता देवकते यांच्यासह पदाधिकारी, ग्रामस्थ, महिला-पुरुष, युवक आणि वारकरी मोठ्या संख्येने उपस्थित होते. महाशिवरात्री यात्रेनिमित्त आयोजित या सोहळ्याने हिमायतनगर नगरी भक्तिरसात न्हाऊन निघाली.
