नांदेड/मुंबई। छत्रपती खा. संभाजीराजे, राजू शेट्टी आणि आ. बच्चू कडू यांच्या नेतृत्वातील तिसऱ्या आघाडीने महाराष्ट्र राज्यातील आठ विधानसभा मतदारसंघासाठी आपल्या उमेदवारांच्या नावाची घोषणा केली आहे. यात नांदेड जिल्ह्यातील देगलूर विधानसभा मतदार संघामधून सुभाष साबणे तर हदगाव विधानसभा मतदार संघामधून माधवराव देवसरकर यांना उमेदवारी जाहीर करण्यात आली आहे.
मुंबईत संयुक्त पत्रकार परिषदेत आ. बच्चू कडू यांनी ही आठ उमेदवारांच्या नावांची घोषणा केली. राज्यातील विधानसभा निवडणुकांसाठी राजकीय पक्षांकडून उमेदवारांची घोषणा होत आहे. भाजपने रविवारी ९९ उमेदवारांची पहिली यादी जाहीर केली असून, महायुतीमधील इतरही घटक पक्ष लवकरच यादी जाहीर करणार आहेत. दुसरीकडे वंचित बहुजन आघाडीने उमेदवारांची नावे जाहीर करण्यात आघाडी घेतली असून ६६ उमेदवारांची घोषणा केली आहे. आता यंदा उदयास आलेल्या तिसऱ्या आघाडीकडूनही उमेदवारांची घोषणा करण्यात आली आहे.
माजी खासदार संभाजीराजे छत्रपती, राजू शेट्टी आणि आमदार बच्चू कडू यांच्या नेतृत्वातील परिवर्तन आघाडीने आपल्या ८ उमेदवारांची नावे जाहीर केली असून, स्वाभिमानीच्या २ उमेदवारांची नावे उद्या दि. २२ ऑक्टोबर रोजी जाहीर करण्यात येणार आहेत. दरम्यान, परिवर्तन महाशक्तीकडून जाहीर करण्यात आलेल्या पहिल्या यादीत आ. बच्चू कडू यांचे नाव असून, बच्चू कडू यांना अचलपूर मतदारसंघातून प्रहारच्या चिन्हावर उमेदवारी जाहीर करण्यात आली आहे.
व्हिजन महाराष्ट्र म्हणून बाकीच्या राज्याने आदर्श घ्यावा, असे कोणताही पायाभर आराखडा आपल्याकडे नाही, म्हणून परिवर्तन महाशक्तीची निर्मिती झाल्याचे आ. बच्चू कडू यांनी म्हटले. तसेच परिवर्तन महाशक्ती आघाडीला चांगल्या प्रतिक्रिया मिळाल्या असून, आज आम्ही महाशक्तीचे उमेदवार जाहीर करीत असल्याचे सांगत आ. बच्चू कडू यांनी स्वतःची उमेदवारी जाहीर केली. परिवर्तन महाशक्ती वैचारिक परिवर्तन आहे, आघाडीत बिघाडी होण्याची शक्यता आहे, तर महायुतीतील एक जण बाहेर जाण्याची शक्यता आहे, असा दावाही आ. बच्चू कडू यांनी केला आहे.
आम्हाला आतापर्यंत ६२ संघटनांनी पाठिंबा दिला आहे. त्यामध्ये रयत शेतकरी संघटनेने देखील पाठिंबा दिलाय; पण ही संघटना सदाभाऊ खोत यांची नाही, ते आमच्यासोबत आले तरी त्यांना आम्ही घेणार नाही, असेही कडू यांनी स्पष्ट केले. दरम्यान, भाजपने ९९ उमेदवारांची पहिली यादी जाहीर केली असून, अचलपूर मतदार संघातून प्रवीण तायडे यांना उमेदवारी देण्यात आली आहे.
