हिमायतनगर, उत्कर्ष मादसवार | श्री परमेश्वर मंदिर ट्रस्ट कमेटीच्या वतीने आयोजित परमेश्वर यात्रा उत्सवानिमित्त घेण्यात आलेल्या विविध स्पर्धांना विद्यार्थ्यांचा उत्स्फूर्त प्रतिसाद लाभत आहे. या स्पर्धांमुळे विद्यार्थ्यांच्या सुप्त कलागुणांना व्यासपीठ मिळत असून त्यांच्या आत्मविश्वासातही भर पडत आहे.
याच पार्श्वभूमीवर आयोजित करण्यात आलेल्या वेशभूषा स्पर्धेत राष्ट्रसाधना पब्लिक स्कूल च्या विद्यार्थ्यांनी प्रथम व द्वितीय क्रमांक पटकावत शाळेचे नाव उज्ज्वल केले. या स्पर्धेत श्लोक माने या विद्यार्थ्याने भगवान महादेव यांची आकर्षक व प्रभावी वेशभूषा साकारत प्रथम क्रमांक मिळविला. त्याच्या सादरीकरणाने उपस्थित प्रेक्षकांचे लक्ष वेधून घेतले.
तसेच कु. भाग्यश्री श्रीनिवास बोंपीलवार हिने माता सरस्वतीची मनोहारी वेशभूषा साकारत द्वितीय क्रमांक पटकाविला. कमळाच्या फुलांमध्ये साकारलेली सरस्वतीची प्रतिमा उपस्थितांना मंत्रमुग्ध करून गेली.
या स्पर्धेत अनेक चिमुकल्या बालकांनी सहभाग नोंदवत आपली कला सादर केली. विजेत्या विद्यार्थ्यांचे परमेश्वर मंदिर ट्रस्टचे उपाध्यक्ष महावीरचंद श्रीश्रीमाळ, सचिव अनंता देवकते, संचालक अनिल मादसवार, संजय माने, यात्रा सब कमेटीचे अध्यक्ष सुभाष शिंदे, उदय देशपांडे, राम नरवाडे, पापा पार्डीकर तसेच सहशिक्षक सचिन कळशे, नागेश कोथळकर, अविनाश बोंपीलवार आदी मान्यवरांनी अभिनंदन करून कौतुक केले.
यात्रा उत्सवातील विविध उपक्रमांमुळे शहरात उत्साहाचे वातावरण निर्माण झाले असून विद्यार्थ्यांच्या सहभागामुळे कार्यक्रम अधिक रंगतदार ठरत आहे.
