नांदेड | जिल्ह्यातील मोटारसायकल चोरीच्या घटनांना लगाम घालत स्थानिक गुन्हे शाखा, नांदेड यांनी मोठे यश मिळवले आहे. “ऑपरेशन फ्लश आऊट” अंतर्गत करण्यात आलेल्या धडक कारवाईत अंतरराज्य मोटारसायकल चोरी टोळीचा पर्दाफाश करत 30 मोटारसायकली (किंमत सुमारे ₹11.08 लाख) जप्त करण्यात आल्या असून तीन आरोपींना अटक करण्यात आली आहे.
गुन्ह्यांची साखळी उघड
किनवट, मुदखेड, हिमायतनगर, मांडवा, माहूर, सिंदखेड, वजिराबाद, शिवाजीनगर (नांदेड), तसेच यवतमाळ, लातूर व तेलंगणा येथे नोंद असलेल्या चोरीच्या गुन्ह्यांचा तपास करताना ही कारवाई निष्पन्न झाली. संबंधित गुन्हे कलम 303(2) BNS व 379 IPC अंतर्गत दाखल असून, हा गुन्हा तारीख: 24 डिसेंबर 2025 रोजी मिळालेल्या (माहिती – गोपनीय) माध्यमातून उघड झाला आहे.
जंगलात लपवलेली चोरीची दुचाकी
मा. अविनाश कुमार, पोलीस अधीक्षक, नांदेड यांच्या आदेशानुसार पोलीस निरीक्षक उदय खंडेराय यांच्या मार्गदर्शनाखाली विशेष पथक कार्यरत होते. दिनांक 23.12.2025 रोजी पेट्रोलिंगदरम्यान मिळालेल्या गोपनीय माहितीनुसार चिखली बु. (ता. किनवट) येथील शेख सलमान ऊर्फ सल्ला यास ताब्यात घेण्यात आले. चौकशीत त्याने साथीदारांसह चोरी केल्याची कबुली देत, तेलंगणा राज्यातील इंचोंडा (जि. आदिलाबाद) येथील जंगल परिसरात दुचाकी लपविल्याचे उघड केले.
30 दुचाकी जप्त; 19 गुन्ह्यांची उकल
छाप्यात वेगवेगळ्या कंपन्यांच्या, नंबर प्लेट नसलेल्या 30 मोटारसायकली हस्तगत करण्यात आल्या. तपासाअंती 19 दुचाकी विविध चोरीच्या गुन्ह्यांशी संबंधित असल्याचे स्पष्ट झाले असून उर्वरित दुचाकींबाबत तपास सुरू आहे. आणखी दोन आरोपींचा शोध सुरू आहे. या प्रकरणी आरोपी शेख सलमान ऊर्फ सल्ला शेख मेहबूब (वय 27), शेख अलताफ ऊर्फ कालू शेख अशरफ (वय 19), शेख सोहेल शेख शौकत ऊर्फ गांजा (वय 24) (सर्व रा. चिखली बु., ता. किनवट, जि. नांदेड)यांना अटक करण्यात आली आहे.
पथकाची कामगिरी व कौतुक
या कारवाईत पो.उप.नि. साईनाथ पुयड, नागनाथ तुकडे, तसेच स्थानिक गुन्हे शाखा व सायबर सेल नांदेड येथील अधिकारी–अंमलदारांनी मोलाची भूमिका बजावली. या उल्लेखनीय कामगिरीबद्दल मा. पोलीस अधीक्षक अविनाश कुमार यांनी सहभागी पथकाचे विशेष कौतुक केले आहे. या कारवाईमुळे दुचाकी चोरी करणाऱ्या टोळ्यांमध्ये दहशत तर नागरिकांमध्ये सुरक्षिततेचा विश्वास निर्माण झाला आहे.
