किनवट,परमेश्वर पेशवे| महाविकास आघाडीचे अधिकृत उमेदवार माजी आमदार प्रदीप नाईक यांना प्रचारात उदंड प्रतिसाद मिळत असून ईस्लापूर ,शिवणी, जलधारा,अप्पारावपेठ, तोटंबा परिसरातील गावोगावी तुतारीचा जोर चांगलाच वाढल्याचे चित्र पाहावयाला मिळत आहे. राष्ट्रवादी काँग्रेस शरदचंद्र पवार पक्ष, काँग्रेस ,शिवसेना उबाठा, माकपा व अन्य मित्र पक्षाचे अधिकृत उमेदवार माजी आमदार प्रदीप नाईक यांचा दि. 11 नोव्हेंबर शनिवार रोजी इस्लापुर परिसरात प्रचार दौरा व गाव भेट दौरा आयोजीत करण्यात आला होता.
या दौऱ्या प्रसंगी प्रथम त्यांनी नंदगाव, नंदगाव तांडा, रिठा तांडा, रिठा गाव परोटी गाव ,परोटी तांडा ,इरेगाव येथे भेटी देऊन मतदारांशी संवाद साधला त्यानंतर ईस्लापूर येथे प्रचार कार्यालयाचे उदघाटन करून त्यांनी हुडी, चंद्रु नाईक तांडा ,दिपला नाईक तांडा, मानसीग नाईक तांडा, मार्लोगोंडा, गोंडेमहागाव, दुर्गानगर कंचली, चिखली या गावी भेटी देऊन मतदारांना महाविकास आघाडीच्या जाहीरनामा बाबत माहिती देत मतदारांशी संवाद साधत निवडून देण्याचे आवाहन केले. या सर्व गावांना माजी आमदार प्रदीप नाईक यांनी भेटी दिल्या असता जागोजागी डफडे, ढोल, ताशा वाजवत त्याचे जंगी स्वागत करण्यात आले.
यावेळी मतदाराचा चांगला प्रतिसाद त्यांना लाभला असून त्याच्या या प्रचार दौऱ्याने परिसरातील वाडी, तांडे,गुडा यासह विविध गावात महाविकास आघाडीचे चांगलेच वातावरण निर्माण झाले. तर परिसरात बोला राम कृष्ण हरी आता वाजवा तुतारीचा जयघोष वाढला आहे. एकंदरीत महाविकास आघाडीचे उमेदवार प्रदिप नाईक यांनी प्रचारात आघाडी घेतल्याचे चित्र या परिसरात पाहावयास मिळत आहे.
