नांदेड| घरकुल लाभधारकांना अल्प दरात रेती मिळावी यासाठी चालू करण्यात आलेल्या बिलोली तालुक्यातील सगरोळी येथील रेतीच्या डेपोतून महसूलच्या संबंधित अधिकारी यांच्या आशीर्वादाने डेपोतील रेतीचा काळा बाजार केला जात असल्याची ओरड होऊ लागली असून, गरजूना मात्र याचा कोणताही फायदा होत नसल्याचे बोलले जात आहे.
सर्व सामान्य लोकांना व घरकुल लाभधारकांना अल्प दरात रेती मिळावी यासाठी राज्य सरकारने शासकीय रेती डेपो योजना अमलात आणली. जिल्हाधिकारी यांच्या आदेशाने नांदेड जिल्ह्यातील बिलोली तालुक्यातील सगरोळी प्रशासनाने शासकीय रेती डेपोची निर्मिती केली. पण डेपोचा फायदा गरजूना होताना दिसत नाही. सध्या महसूल प्रशासनाचे अधिकारी व कर्मचारी आंदोलन करत आहेत. त्यामुळे शासकीय डेपोवर तलाठी, मंडळ अधिकारी, ग्रामसेवक कुणीही फिरकत नाहीत. तरी देखील ऑनलाइनच्या नावाखाली रेती माफिया हे झिरोमध्ये रेती चालवत आहेत.
झिरो म्हणजे ब्लॅक मध्ये विकत असून, ही रेती तेलंगणा, कर्नाटक तसेच लातूर, सोलापूर या ठिकाणी जात आहे. महसूल प्रशासन सोडा पण पोलीस प्रशासन देखील याकडे दुर्लक्ष करत असल्याने शासनाच्या अल्प दरातील डेपो योजनेच्या नावाखाली रेतीचा काळाबाजार होताना दिसून येत आहे. परिणामी सर्व सामान्य लोकांना व घरकुल लाभधारकांना याचा लाभ मिळत नसल्याने दिसत आहे. शासनाच्या योजना केवळ स्वार्थी अधिकारी, कर्मचारी यांच्यामुळे धुळीस मिळत असून, याचा फायदा मात्र रेती माफियांना होत असल्याचे यावरून दिसून येत आहे.
