Himayatnagar Accident : म्हसोबा नाल्यावर मृत्यूचा सापळा; भरधाव वाहनाच्या धडकेत तरुण ठार

हिमायतनगर| तालुक्यात सलग अपघातांच्या घटनांनी नागरिकांमध्ये भीतीचे वातावरण निर्माण झाले असताना सरसम–हिमायतनगर मार्गावर पुन्हा एक भीषण अपघात घडला. म्हसोबा नाल्याजवळ झालेल्या या दुर्घटनेत एका तरुणाचा जागीच मृत्यू झाला असून दोघे गंभीर जखमी झाले आहेत. ही घटना शुक्रवारी सायंकाळी सुमारे ८.३० वाजताच्या सुमारास घडली.

मिळालेल्या माहितीनुसार, सरसम येथील रमेश गुंडेकर, अविनाश गोखले व लखन पंड्या हे तिघे मोटरसायकलवरून हिमायतनगरहून सरसमकडे जात होते. दरम्यान, भरधाव वेगाने येणाऱ्या अज्ञात वाहनाने त्यांच्या दुचाकीला जोरदार धडक दिली.

या अपघातात लखन पंड्या यांचा जागीच मृत्यू झाला, तर रमेश गुंडेकर व अविनाश गोखले हे गंभीर जखमी झाले. जखमींना तत्काळ हिमायतनगर ग्रामीण रुग्णालयात दाखल करण्यात आले असून त्यांच्यावर उपचार सुरू आहेत.

अपघातानंतर वाहनचालक फरार झाला असून पोलिसांकडून त्याचा शोध सुरू आहे. या घटनेमुळे सरसम–हिमायतनगर मार्गावरील वाहतुकीच्या सुरक्षेबाबत गंभीर प्रश्न उपस्थित झाले आहेत. दरम्यान, नागरिकांकडून संतप्त प्रतिक्रिया व्यक्त होत आहेत.

“सलग अपघातांमुळे नागरिक भयभीत झाले आहेत. राष्ट्रीय महामार्गावर तात्काळ स्पीड ब्रेकर व सुरक्षा उपाययोजना करणे गरजेचे आहे,” अशी मागणी नागरिकांनी केली. “अपघातांची मालिका थांबवण्यासाठी प्रशासनाने केवळ तपासणी नव्हे तर ठोस उपाययोजना राबवणे आवश्यक आहे,” असेही नागरिकांचे मत आहे. या पार्श्वभूमीवर प्रशासनाने तातडीने पावले उचलावीत, अशी मागणी जोर धरत आहे.