हिमायतनगर| तालुक्यातील मौजे पोटा बू.येथील माजी उपसरपंच यांनी पिण्यासाठी उपयुक्त असलेली सार्वजनिक विहिर सुड बुध्दी ने रातोरात दगड माती टाकून बुजवल्याने नागरीकांना पिण्याच्या पाण्यासाठी वनवन भटकंती करावी लागत आहे. या संदर्भात सरपंच, ग्रामसेवक यांनी तहसीलदार, गटविकास अधिकारी, पोलिस ठाण्यात निवेदन देऊन उपरोक्त प्रकरणी कारवाई करण्याची मागणी केली आहे. तसेच गावकऱ्यांनी आत्मदहनाचा इशारा दिला आहे.
हिमायतनगर तालुक्यातील सर्वात मोठी ग्रामपंचायत असलेल्या पोटा (बु) येथील दलित वस्ती शेजारील सार्वजनिक ठिकाणी असलेल्या या विहिरींवर ग्रामपंचायत ने पाणी फिल्टर मशीन बसवून गावाला स्वच्छ पाणी उपलब्ध करून दिले होते. परंतू गावातील माजी उपसरपंच रामराव गणपतराव बिरकलवार यांनी अगोदरच त्या परिसरातील जागेवर अतिक्रमण केले व नंतर दि.१३ रोजी जेसीबी ने रातोरात सार्वजनिक असलेल्या त्या विहिरीत दगड ,मुरूम,माती टाकुन विहीर बुजवून टाकली.
परिणामी पिण्याच्या पाण्याचा प्रश्न गंभीर स्वरुपाचा बनला आहे. सदरचे प्रकरण न्यायालयात चालूं असताना सदरील जागेवर असणाऱ्या सार्वजनिक विहरीत दगड माती टाकून विहीर बुजविण्यात आली आहे. त्यामुळे कायदा व सुव्यवस्थेचा प्रश्न निर्माण झाला आहे. आणि गावात तिव्र पाणी टंचाई निर्माण झाली आहे. या प्रकरणी माजी सभापती पांडुरंग दुधाडे यांनी दोन दिवसात बुजवलेली विहीर खोदून पुर्ववत करूण नाही दिसल्यास आत्मदहन करणार असल्याचा इशारा निवेदनात प्रशासनाला दिला आहे.
निवेदनावर सरपंच लक्ष्मीबाई जाधव, उपसरपंच माधव डोखळे, ग्रामपंचायत सदस्या कांताबाई डोखळे, नागनाथ बच्छेवाड,आश्विनी पुल्लेवार,भाग्य श्री माने,संजय माने,शे.परविना बेगम शे.रहिम, प्रभावती घुमनर, नागोराव जळपते आदींसह शेकडो गावकर्यांच्या स्वाक्षऱ्या आहेत.